قازاق حالقىنان كورگەن جاقسىلىقتى كارىستەر ەشقاشان ۇمىتپايدى - سانگ چەول كيم، وڭتۇستىك كورەيا

ورال. قازاقپارات - وتكەن عاسىردىڭ وتىزىنشى جىلدارى كارىس ۇلتىنىڭ ءبىر بولىگى قازاقستانعا جەر اۋدارعان بولاتىن.

قازاق حالقىنىڭ سول كەزدە جاساعان جاقسىلىعىن كارىستەر ەشقاشان ۇمىتپايدى. بۇل تۋرالى «تاريحتان تاعىلىم - وتكەنگە تاعزىم» جوباسى اياسىندا ورال قالاسىندا وتكەن «شەرلى شەجىرە اماناتى» اتتى حالىقارالىق فورۋمعا قاتىسقان وڭتۇستىك كورەياداعى حانكۋك ۋنيۆەرسيتەتى ورتالىق ازيانى زەرتتەۋ ينستيتۋتىنىڭ پروفەسسورى سانگ چەول كيم ءمالىم ەتتى.

«سوناۋ قيىن جىلداردا قازاقستان جەر اۋدارىلىپ كەلگەن كوپتەگەن ۇلت وكىلدەرىنە پانا بولىپ، ولاردىڭ امان قالىپ، ءوسىپ-وركەندەۋىنە جاعداي جاسادى. قازاق حالقىنىڭ قوناقجاي پەيىلى مەن كەڭدىگىنىڭ شاپاعاتىن كورگەن حالىقتاردىڭ ىشىندە كارىستەر دە بار. كارىس حالقى - ەجەلدەن ءوزىنىڭ ەڭبەكقورلىعىمەن، تاباندىلىعىمەن اتى شىققان جۇرت. سوندىقتان قۇنارلى قازاق توپىراعىندا قازاقتان جاقسىلىق كورگەن باۋىرلارىمىز تامىرىن تەرەڭگە جىبەرىپ، ماۋەلى بايتەرەككە اينالدى. ەل ءومىرىنىڭ بارلىق سالاسىنا بەلسەنە ارالاسۋدا. قازاق ەلىندەگى ۇلتارالىق جانە ءدىنارالىق تاتۋلىقتىڭ تامىرى تەرەڭدە جانە ودان سايىن بەكي تۇسەدى دەپ ويلايمىن»، دەدى عالىم.

فورۋم بارىسىندا سانگ چەول كيمگە ەلباسى جارلىعىمەن بەرىلگەن «قازاقستان حالقى اسسامبلەياسىنا 20 جىل» مەرەكەلىك مەدالى تابىس ەتىلدى.

ايتا كەتەيىك، ورال قالاسىندا «قازاق حالقىنا مىڭ العىس!» اتتى ەسكەرتكىشتى رەسپۋبليكادا ءبىرىنشى بولىپ باتىس قازاقستان كارىستەرى ەتنومادەني بىرلەستىگى ورناتقان بولاتىن. ب ق و كارىستەرى ەتنومادەني بىرلەستىگى ءتوراعاسىنىڭ ورىنباسارى، ەڭبەك ارداگەرى اناتولي كيمنىڭ سوزىنە قاراعاندا، مۇنىڭ ءمانىسى مىنادا.

ستاليننىڭ كەسىرىنەن قازاقستان حالىقتار تۇرمەسىنە اينالدى. اشارشىلىقتان، قۋعىن-سۇرگىننەن ميلليونداعان قازاق قازا بولدى. وراسان زور ادام شىعىنىنا قاراماستان، قازاق حالقى كۇشتەپ جەر اۋدارىلعان 60 قا جۋىق ۇلتتاردىڭ وكىلدەرىنە شىن جاناشىرلىق كورسەتتى، سوڭعى نانىمەن ءبولىستى. «مويىنداۋىمىز كەرەك، ءبىز قازاق حالقىنىڭ ارقاسىندا عانا ءتىرى قالىپ، وسى باقىتتى كۇندەرگە جەتتىك. ول ەشبىر دالەلدى تالاپ ەتپەيتىن اقيقات. قازىر قازاقستاندىق ءاربىر مىڭ كارىستىڭ 80 پايىزىنىڭ جوعارى ءبىلىمى بار. كارىستەرگە ەكىنشى وتان بولعان قازاق ەلىنە شىن جۇرەكتەن شىققان العىسىمىزدى ءبىلدىرۋ ءۇشىن 2012-جىلى وسى مونۋمەنتتى ءوز قارجىمىزعا ورناتقان ەدىك»، دەدى ا. كيم.