مەملەكەت باسشىسى: قيىن كەزەڭدە جۇمىس ورىندارىنىڭ قىسقارۋىنا قارسىمىز
بۇل تۋرالى بۇگىن اقمولا وبلىسىنا قاراستى بۋراباي كەنتىندە ت م د- عا قاتىسۋشى مەملەكەتتەر دەلەگاتسيالارى باسشىلارىمەن كەزدەسكەن ەلباسى نۇرسۇلتان نازاربايەۆ ايتتى.
«ەكونوميكا ءوسىمىنىڭ جانە وسىناۋ قيىن كەزەڭدە ءبىزدىڭ ادامدارىمىزدىڭ جۇمىسپەن قامتىلۋ دەڭگەيىنىڭ تومەندەۋىنە قارسىمىز. اۋىر ونەركاسىپ سالاسى اسىرەسە، تاۋ-كەن مەتاللۋرگيادا ءوندىرىس كولەمى تومەندەپ، جۇمىس ورىندارىنىڭ قىسقارۋى بايقالعاندا بىزدەر ولارعا بالاما جۇمىس ورىندارىن ۇسىنامىز»، - دەدى ەلباسى.
مەملەكەت باسشىسىنىڭ اتاپ وتۋىنشە، بالاما جۇمىس ورىندارى قازاقستاندا قولعا الىنىپ وتىرعان ينفراقۇرىلىمدىق باعدارلامالار ەسەبىنەن قۇرىلۋدا.
«وسى جىلدار ىشىندە ءبىز ۇلتتىق قورعا قارجى جينادىق. ەندىگى ۋاقىتتا ونى قازاقستاننىڭ يندۋستريالدى قاڭقاسىن تۇبەگەيلى وزگەرتۋ ءۇشىن پايداعا جاراتا الامىز»، - دەدى ن. نازاربايەۆ.
اۆتور: مارلان جيەمباي