ق ر سىرتقى ىستەر ءمينيسترى قازاقستاننىڭ سيريالىق احۋالعا قاتىستى ۇستانىمىن جاريا ەتتى
«ءبىزدىڭ كوزقاراسىمىز بويىنشا، بۇگىندە سيريالىق داعدارىس ەڭ وتكىر حالىقارالىق داعدارىستاردىڭ ءبىرى. ونىڭ تەرىس ىقپالى تاياۋ شىعىس ايماعىنا عانا ەمەس، جالپى جاھاندىق جاعدايعا قاتتى اسەر ەتتى»، - دەدى مينيستر استاناداعى باسپا ءسوز ءماسليحاتىندا.
ق ر س ءى م باسشىسى اتاپ وتكەنىندەي، سيريادا اۋقىمدى گۋمانيتارلىق اپات ورىن الۋدا.
«سيرياداعى اسكەري قيمىلداردىڭ سالدارىنان 250 مىڭعا تارتا ادام كوز جۇمدى، 4 ميلليونعا جۋىق ادام ەلدەن باس ساۋعالادى. ولاردىڭ تاعدىرى وتە قيىن. بۇل جاعداي ولاردىڭ ۇدەرە كوشكەن ەلدەردە - تۇركيادا، يوردانيادا، ليۆاندا الەۋمەتتىك- ەكونوميكالىق سيپاتتاعى تۇيتكىلدەردىڭ ۋشىعۋىنا اكەپ سوقتىرۋدا. تالاي ادامدارعا قايعى- قاسىرەت شەكتىرگەن مۇنداي احۋالعا توزۋگە بولمايدى»، - دەدى ە. ىدىرىسوۆ.
«ءبىزدىڭ ارەكەتىمىز - اشىق، ترانسپارەنتتى، ءادىل. ءبىزدىڭ كەزدەسۋىمىز سيريالىق داعدارىستى رەتتەۋگە باعىتتالعان حالىقارالىق ءىس- قيمىلدارعا قايشى كەلمەيدى. ءبىزدىڭ كەزدەسۋ ەڭ الدىمەن، جەنيەۆا پروتسەسىنە ساي كەلەتىن حالىقارالىق ىنتىماقتاستىققا قولداۋ كورسەتۋگە باعىتتالعان»، - دەدى مينيستر.
ەسكە سالايىق، 25-27 - مامىر كۇندەرى استانادا سيريالىق وپپوزيتسيانىڭ ءتۇرلى توپتارى داعدارىستى بەيبىت جولمەن شەشۋ بويىنشا كەلىسسوزدەر جۇرگىزدى. ونىڭ قورىتىندىسىندا ساياسي شەشىمدەر بويىنشا استانا دەكلاراتسياسى دا قابىلداندى. قۇجاتتا قاتىسۋشىلاردىڭ باسىم بولىگى سيريادان شەتەلدىك جاۋىنگەرلەردى شىعارىپ، لاڭكەستىككە قارسى بىرلەسكەن مايدان قۇرۋ جونىندەگى ۇسىنىستى قولدادى.
اۆتور: جاسۇلان جولدىبايەۆ