رەسەي «ميسترال» كەمەسىنەن رەسمي تۇردە باس تارتتى
13:40, 27 - مامىر 2015
استانا. قازاقپارات - ر ەسەي بيلىگى فرانسيانىڭ قۇنى ءبىر جارىم ميلليارد ا ق ش دوللارىنا باعالانعان ەكى «ميسترال» اسكەري كەمەسىن ساتىپ الۋعا قاتىستى جاسالعان كەلىسىمىنەن باس تارتاتىنىن مالىمدەدى.
وتكەن جىلدىڭ قىركۇيەك ايىندا فرانسيا پرەزيدەنتى فرانسۋا وللاند ءوز ەلى «رەسەيدىڭ ۋكرايناداعى ساياساتىنا بايلانىستى» اسكەري تىكۇشاق تاسىمالداۋعا ارنالعان كەمە تاپسىرىسىن ورىندامايتىنىن مالىمدەگەن.
اسكەري- ونەركاسىپ كوميسسياسى باسشىسىنىڭ ورىنباسارى ولەگ بوچكاريەۆ ت ا س س اگەنتتىگىنە «رەسەيدىڭ «ميسترال» كەمەلەرىن المايتىنى ايقىن بولدى. ەندى تەك فرانسيانىڭ رەسەيگە قايتارۋى ءتيىس قارجىسى تۋرالى اڭگىمە عانا قالدى» دەگەن. ول ماسكەۋ تىكۇشاق تاسىمالدايتىن ءوز كەمەسىن قۇراستىرۋدى ويلاستىرىپ جاتقانىن، ءبىراق ونىڭ «ميسترال» كەمەسىنە ۇقسامايتىنىن ايتقان. وسى ايدىڭ باسىندا كرەمل پاريج رەسمي تۇردە كەلىسىمنەن باس تارتۋدى سۇراعانىن حابارلاعان.
«ازاتتىق»