ب. ساپاربايەۆ: وقۋشىلاردىڭ قازىرگى زامانعا ساي ءبىلىم الۋلارىنا بارلىق جاعدايلار جاسالۋدا - فوتو
«بۇگىن - سىزدەردىڭ ومىرلەرىڭىزدە تاريحي، ەرەكشە كۇن. ون ءبىر جىل وقىعان مەكتەپتەرىڭىزبەن، وزدەرىڭىزدىڭ مۇعالىمدەرىڭىزبەن قوشتاسىپ، ۇلكەن جاڭا ومىرگە جول باساسىزدار. ابايدىڭ ءسوزى بار: «سەن دە ءبىر كىرپىش دۇنيەگە، تەتىگىن تاپ تا بار قالان». اتا- انالارىڭىز، مۇعالىمدەرىڭىز، مەملەكەت سىزدەر جاقسى تاربيە مەن بىلىم السىن دەپ بارلىق جاعدايلار جاساۋدا.
قازاقستاندا مەملەكەت باسشىسى نۇرسۇلتان نازاربايەۆتىڭ باسشىلىعىمەن بىلىمگە قانداي جاعداي جاسالىپ جاتقانىن وزدەرىڭىز بىلەسىزدەر. بۇنىڭ بارلىعى سىزدەر باسقا مەملەكەتتىڭ ازاماتتارى سياقتى قازىرگى زاماننىڭ تالابىنا ساي ءبىلىم السىن، ەرتەڭ بارلىقتارىڭىز قازاقستاننىڭ ۇلكەن ازاماتتارى بولسىن، قازاقستاننىڭ دامۋىنا ءوز ۇلەستەرىن قوسسىن دەگەن نيەتپەن جاسالىپ جاتىر. باسقا مەملەكەتتەردە جوق «بولاشاق» باعدارلاماسى دا سىزدەرگە ارنالعان. سىزدەر قازىرگى تاڭدا وزدەرىڭىزدىڭ بىلىمدەرىڭىزگە ساي دۇنيەءجۇزىنىڭ ەڭ مىقتى دەگەن جوعارى وقۋ ورىندارىندا مەملەكەتتىڭ ەسەبىنەن ءبىلىم الۋعا مۇمكىندىكتەرىڭىز بار»، - دەدى ۆيتسە- پرەمەر استانا قالاسىنىڭ №3 مەكتەپ- گيمنازياسىنىڭ سالتاناتتى شاراسىندا.
ءسوز بارىسىندا ب. ساپاربايەۆ ۇلتتىق ءبىرىڭعاي تەستىلەۋدىڭ بيىل وزگەرىسكە ۇشىراعانىن دا تىلگە تيەك ەتتى.
«ەرتەڭ سىزدەر بارلىقتارىڭىز ءبىرىڭعاي ۇلتتىق تەستىلەۋگە قاتىساسىزدار. بيىلعى جىلى وعان ءبىراز وزگەرىستەر ەنگىزىلدى. بۇل دا سىزدەردىڭ ەڭ ءبىرىنشى ەمتيحاندارىڭىز. ارى قاراي جوعارى وقۋ ورىندارىنا ءتۇسىپ، قازاقستاننىڭ دامۋىنا، وركەندەۋىنە وزدەرىڭىزدىڭ ۇلەستەرىڭىزدى قوسىڭىزدار»، - دەپ ءتۇيدى ءسوزىن ول.