قازاقستاندا جاسالعان: «ورال مەحانيكالىق زاۋىتىنىڭ» ونىمدەرى الىس- جاقىن ەلدەرگە كەڭىنەن تانىمال - فوتو

ورال. قازاقپارات - ورال قالاسىنداعى ىرگەلى كاسىپورىنداردىڭ ءبىرى - «ورال مەحانيكالىق زاۋىتى» ج ش س ونىمدەرى الىس- جاقىن ەلدەرگە كەڭىنەن تانىمال.

كاسىپورىن ديرەكتورىنىڭ ءبىرىنشى ورىنباسارى اناتولي سميرنوۆتىڭ ايتۋىنشا، زاۋىت «بەلارۋس» تراكتورلارىنا، زيل، گاز اۆتوكولىكتەرىنە، پاز اۆتوبۋستارىنا، باسقا دا ارنايى تەحنيكالارعا ءيىندى بىلىك شىعارۋمەن اينالىسادى. كەڭەس داۋىرىنەن بەرى وسى ءونىمدى جونەلتىپ كەلە جاتقان زاۋىتتىڭ بەس سەحىندا سونداي- اق پلاستيك تەرەزەلەر، توسەمتاس، پروفتاباقشا سىندى قۇرىلىس ماتەريالدارى، مۇناي- گاز جابدىقتارى شىعارىلادى.

كەيىنگى جىلدارى زاۋىت مۇناي- گاز جانە بۇرعىلاۋ جابدىقتارى ءۇشىن قوسالقى بولشەكتەر، تارماقتار مەن دەتالداردى كۇردەلى جوندەۋ مەن دايىنداۋدى جولعا قويدى. كوپتەگەن قازاقستاندىق مۇنايگاز كومپانيالارىمەن ءوزارا ءتيىمدى بايلانىس جاسالۋدا. ال «قاراشىعاناق پەتروليۋم وپەرەيتينگ ب. ۆ. » كومپانياسىمەن كەلىسىمشارت ازىرگە جوق.

سوڭعى ەكى جىلدا سونداي- اق ءيىندى بىلىكتەردىڭ جاڭا تۇرلەرى شىعارىلدى. زاۋىتتاعى امبەباپ جابدىق ۇساعىنان باستاپ ءىرى (ۇزىندىعى 8-10 مەتر) دەتالداردى مەحانيكالىق وڭدەۋگە مۇمكىندىك بەرەدى. قۇرىلىس ماتەريالدارى دا ەستەتيكالىق، ەكولوگيالىق جاعىنان قازىرگى زامانعى تالاپتارعا تولىق ساي كەلەدى. بارلىق ءونىم CT KZ جەلىسى بويىنشا سەرتيفيكاتتالعان. كاسىپورىندا يسو 9001-2008 حالىقارالىق ستاندارتتارى تالاپتارىنا سايكەس ساپا مەنەدجمەنتى جۇيەسى ەنگىزىلگەن.   وعان قوسا بيىلعى ناۋرىزدا ق ر مەملەكەتتىك تاۋارلار بەلگىسى تىزىلىمىنە ەنگىزىلگەن زاۋىتتىڭ تاۋار بەلگىسى ونىڭ ءونىمىن ىشكى جانە سىرتقى نارىققا كەڭىنەن شىعارۋعا مۇمكىندىك بەرەدى.

قوسالقى بولشەكتەر مەن ءيىندى بىلىكتەردىڭ نەگىزگى بولىگى رەسەي مەن بەلارۋسقا، 15 پايىزعا دەيىنى الىس شەتەلگە جونەلتىلسە، 8-10 پايىزى قازاقستاندا قالادى. زاۋىت جىلىنا ون مىڭداي ءيىندى بىلىك شىعارادى. قۇرىلىس ماتەريالدارى وبلىس پەن كورشىلەس ايماقتارعا جىبەرىلەدى.

زاۋىتتا 140 تاي ادام تۇراقتى جۇمىس جاسايدى. جىلدار بويى بىردە- ءبىر ادام قىسقارتىلعان ەمەس. جاڭا تەحنولوگيالارعا سايكەس ءوندىرىستى وڭتايلاندىرۋ جۇمىسى جۇرگىزىلۋدە. ماسەلەن، ءبىر ادام ەكى- ءۇش ستانوكتا بىرنەشە جۇمىستى قاتار اتقارا الادى. سونىمەن قاتار ينۆەستورلاردى تارتىپ، بارلىق ينفراقۇرىلىمى بار بوس عيماراتتاردا بىرلەسكەن كاسىپورىن قۇرۋ دا ويلاستىرىلۋدا.