بىردەن ەۋرازيالىق ەكونوميكالىق وداقتىڭ ورتاق ۆاليۋتاسىن قۇرۋ ۇلكەن قاتەلىك بولار ەدى - د. پانكين
«مەنىڭشە، ۆاليۋتا - ەڭ سوڭىنان كوتەرىلۋى ءتيىستى ماسەلە. مۇنى ەۋروپالىق ينتەگراتسيا تاجىريبەسى دە كورسەتىپ وتىر. 30 جىلعا سوزىلعان ينتەگراتسيالىق پروتسەستەر تۇپتەپ كەلگەندە ەۋرونىڭ قۇرىلۋىنا تۇرتكى بولدى. ال قازىر بىزدە جاعداي قانداي؟ ءتىپتى، سالىق- بيۋدجەت ساياساتىمىز جانە باسقا دا ەكونوميكالىق ۇستانىمدارىمىز كەلىسىلمەگەن. بۇل بايىپتى پروبلەما ەكەندىگى ءسوزسىز»، - دەدى ول.
ونىڭ اتاپ وتۋىنشە، اتالعان پروبلەمالاردى رەتتەپ الماي ۆاليۋتا قۇرۋ ەۋروايماقتىڭ كۇيرەۋىنە اكەلمەسە دە، كوپتەگەن كۇردەلى ماسەلەلەردى تۋىنداتاتىندىعى انىق. ورتاق ۆاليۋتا بولۋى ءۇشىن ۆاليۋتا ساياسات، بيۋدجەت ساياساتى تولىعىمەن ۇيلەستىرىلىپ، وداققا مۇشە ەلدەردىڭ بارلىعى بىردەي ەكونوميكالىق ساياساتتىڭ ورتاق ۇستانىمىن ساقتاپ، بيۋدجەتتىك ىنتالاندىرۋدىڭ بىرەگەي نورماسىن قولدانۋ ءتيىس.
«قىرعىزستاندا جان باسىنا شاققانداعى تابىس 1000، قازاقستاندا 13 مىڭ، رەسەيدە 14 مىڭ دوللاردى قۇرايدى. ياعني، تابىس دەڭگەيى، ەكونوميكا قۇرىلىمى الۋان ءتۇرلى. سوندىقتان دا ءبىر سەكىرىپ، ءبىرىڭعاي ۆاليۋتاعا كوشۋ ۇلكەن قاتەلىك بولار ەدى»، - دەدى د. پانكين.