جاركەن بودەش ۇلى. ارشا
11:56, 06 - مامىر 2015
تارتۋ ەتتىڭ تۋعان جەر ارشاسىن كوك،
ساعىنىشى ءىنىمنىڭ تارقاسىن دەپ.
سول ارشادان كوزىمە ەلەستەدى،
اۋىل- ايماق،
اتا- جۇرت،
بارشا سۋرەت...
بار بولعانى ءبىر تۇتام سول ارشادان،
ءيىسى اڭقيدى تاۋىمنىڭ كوپ اڭساعان.
ءيىسى اڭقيدى قىپ- قىزىل تابا ناننىڭ،
شىعاتۇعىن بۇرقىراپ قولامتادان.
ءيىسى اڭقيدى انامنىڭ،
اكەمنىڭ دە،
ءيىسى اڭقيدى ماقالدىڭ، ماتەلدىڭ دە...
شىركىن، اعا، وسىناۋ كوك ارشانى،
جانعا قۋات بولسىن دەپ اكەلدىڭ بە؟
يىسكەيمىن دە باسامىن وي الاڭىن،
بۇل ادەتتى مەن قالاي قويا الامىن.
سول ارشانىڭ تۇبىندە مىزعيمىن دا،
سول ارشانىڭ تۇبىندە ويانامىن.
بولماسىن دەپ كوڭىلدىڭ قوشى دارا،
يىسكەتەمىن ارشانى دوسىما دا.
يىسكەتەمىن ارشانى بالا ما دا،
جەر ساعىنۋ دەگەنىڭ وسى ما، اعا؟
و، تۋعان جەر، ارشاسى - ەرگە سەنىم،
اڭقىپ تۇرعان ءيىسى بار مەندە سەنىڭ.
سىنىق سۇيەم وسىناۋ تۇقىلىڭدى،
ات باسىنداي التىنعا بەرمەس ەدىم.