الماتى- مينسك اۋە رەيسى ءوز قىزمەتىن باستادى
اۋە رەيسىن اشۋ «بەلاۆيا» كومپانياسىنىڭ زاماناۋي Boeing ۇشاقتارىن ساتىپ الۋىنا بايلانىستى مۇمكىن بولىپ وتىر. ەندى ساپارلار اپتاسىنا ەكى مارتە جۇرگىزىلەدى. ال ۇشۋ ۋاقىتى شامامەن 5 ساعات.
«بەلاۆيا» كومپانياسى وكىلدىگىنىڭ مالىمدەۋىنشە، رەيسكە سۇرانىس جوعارى. جاز مەزگىلىندە «بەلاۆيا» استانا، قاراعاندى، قوستاناي جانە پاۆلودار ايماقتارىنا دا تىكەلەي بايلانىس ورناتپاق.
«قازىرگى ۋاقىتتا قازاقستان مەن بەلارۋس اراسىنداعى تاۋار اينالىمى 1 ميلليارد ا ق ش دوللارى كولەمىندە. ايتارلىقتاي مۇمكىندىكتەرىمىز بار، سوندىقتان بۇل كورسەتكىشتى كوبەيتۋ قاجەت. جاڭا رەيس تاۋار اينالىمىن جانداندىرادى دەپ ويلايمىن. سونىمەن قاتار الماتى تۋريستىك ايماق رەتىندە كوپشىلىكتىڭ قىزىعۋشىلىعىن تۋدىرادى»، - دەيدى قازاقستاننىڭ بەلارۋس رەسپۋبليكاسىنداعى توتەنشە جانە وكىلەتتى ەلشىسى ەرعالي بولەگەنوۆ.
«ءبىز وتە قۋانىشتىمىز. ازىرگە رەيس اپتاسىنا ەكى مارتە ۇشاتىن بولادى، الداعى ۋاقىتتا ساپارلار لەگىن ارتتىرۋ كوزدەلىپ وتىر. كومپانيامىز كەلەسى جىلى تاعى دا جاڭا ۇشاقتار ساتىپ الادى. سول كەزدە اتالعان رەيس كۇندەلىكتى بولماق»، - دەپ اتاپ ءوتتى «بەلاۆيا» اۋە كومپانياسى باس ديرەكتورىنىڭ ورىنباسارى يگور چەرگينەتس.