ن. نازاربايەۆ: ءبىز الاساپىران زاماننان گۇلدەنۋ جولىنا وتتىك

استانا. قازاقپارات - ءبىز الاساپىران زاماننان گۇلدەنۋ جولىنا وتتىك. بۇگىن ق ر پرەزيدەنتىنىڭ ۇلىقتاۋ راسىمىندە ەلباسى نۇرسۇلتان نازاربايەۆ وسىلاي دەدى.

 «ءبىز بىرگە الاساپىران زاماننان گۇلدەنۋ جولىنا وتتىك. بىزدەر كۇردەلى ۇشتىك ترانزيتتەن، كەڭەستىك جۇيەدەن نارىقتىق ەكونوميكاعا، دەموكراتياعا جانە جاڭا ەتنوسارالىق كەلىسىمگە ەشقانداي ەكستسەسسىز ءارى كاتاكليزمسىز وتتىك» ، - دەدى ق ر پرەزيدەنتى.

مەملەكەت باسشىسى سونىمەن بىرگە ءبىزدىڭ مەملەكەتتىك قۇرىلىمىمىزدىڭ مىعىم ەكەندىگىن 2007-2009 -جىلدارداعى جاھاندىق ەكونوميكالىق داعدارىس بارىسىندا دالەلدەگەندىگىمىزدى باسا اتاپ ءوتتى. «باسقا مەملەكەتتەرگە قاراعاندا، قازاقستان ەكونوميكالىق ءوسىمدى ساقتاپ قالدى جانە ءبىزدىڭ حالقىمىزدىڭ ءومىر ءسۇرۋ دەڭگەيىن قۇلدىراتپادى. 2012 -جىلى قازاقستان الەمنىڭ ەڭ دامىعان، الەمنىڭ بارىنشا باسەكەگە قابىلەتتى 50 ەلىنىڭ قاتارىنا قوسىلدى. ءبىز حالقى تابىستى ورتاشا دەڭگەيگە اينالدىق جانە الەمنىڭ ءىرى 50 ەكونوميكاسى قاتارىنا ەندىك. «قازاقستان -2030» ستراتەگياسى قازىرگى ۋاقىتتا جۇمىس ىستەپ تۇر» ، - دەدى ق ر پرەزيدەنتى.

«رەسپۋبليكا» ءسوزى لاتىننان تىكەلەي اۋدارعاندا ورتاق ءىس دەگەندى بىلدىرەدى. سوندىقتان قازاقستاندى جاڭعىرتۋ - بۇل ءبىزدىڭ ورتاق ءىسىمىز. الدىمىزدا قانداي دا سىناقتار بولماسىن، ءبىز مەملەكەتىمىزدىڭ قۋاتىنا، حالقىمىزدىڭ دانالىعىنا سۇيەنە وتىرىپ، ونى ەڭسەرىپ شىعامىز» ، - دەدى نۇرسۇلتان نازاربايەۆ.

بۇدان بولەك، ەلباسى قازاقستان حالقى كوپتەگەن قيىندىقتاردى ەڭسەرىپ وتكەنىن، ەندىگى كۇنى جاڭا داۋىرگە شەشىمدى قادام باسىپ وتىرعانىن جەتكىزدى.

 

 اۆتور: مارلان جيەمباي