قىتايلىق شانشي جەكە مەنشىك جوعارى وقۋ ورنى تارازدا ۋنيۆەرسيتەت سالۋدى جوسپارلاۋدا

تاراز. قازاقپارات - قىتاي مەن ورتالىق ازيا ەلدەرىنىڭ وكىلدەرى قاتىسقان حالىقارالىق ىنتىماقتاستىق فورۋمى قىتايلىق شانشي پروۆينسياسىنىڭ شيان قالاسىندا ءوتتى.

قازاقستاندىق دەلەگاتسيا مۇشەسى، ق ر جاراتىلىس تانۋ عىلىمدارىنىڭ ۇلتتىق اكادەمياسىنىڭ اكادەميگى راشيد باكيروۆتىڭ سوزىنە قاراعاندا، فورۋمدى جي گۋن دان («ادىلدىككە ۇمتىلۋ») قىتايلىق پارتياسى ۇيىمداستىرعان.

شارانىڭ ماقساتى - كونە ساۋدا جولى وتكەن ءبىرقاتار ەلدەردە جاڭا نىسانداردى سالۋ مۇمكىندىكتەرىن زەرتتەۋ، ۇلى جىبەك جولى ەكونوميكالىق بەلدەۋىن قۇرۋ اياسىنداعى ىنتىماقتاستىق مۇمكىندىكتەرىن تالقىلاۋ، دەپ اتاپ ءوتتى ر. باكيروۆ.

قازاقستان، وزبەكستان جانە تاجىكستاننان بارعان قوناقتارعا شانشي پروۆينسياسىنداعى پەيحۋا ۋنيۆەرسيتەتىنە ەكسكۋرسيا ۇيىمداستىرىلدى. مۇندا 20 مىڭنان استام ستۋدەنت ءبىلىم الادى.

كەزدەسۋدە پەيحۋا ۋنيۆەرسيتەتىنىڭ رەكتورى جانە يەسى جاڭ بو قىتاي ۇلى جىبەك جولىندا ۋنيۆەرسيتەت سالۋدى جوسپارلاپ وتىرعانىن ايتتى.

«ارمانىم - ۇلى جىبەك جولىندا حالىقارالىق ۋنيۆەرسيتەت سالۋ. وندا قىتايدان، قازاقستاننان جانە ورتا ازيا ەلدەرىنەن ستۋدەنتتەر ءبىلىم الار ەدى، - دەدى ول. - بۇل ماسەلە بويىنشا، ياعني ونىڭ قايدا سالىناتىنى جونىندە ق ح ر- دىڭ شانشي جانە قازاقستاننىڭ ۇكىمەتتەرىنە بارماقپىز».

جاڭ بو ايتقانداي، قازىر شانشي ۇكىمەتى مەن جامبىل وبلىسى اراسىنداعى مادەني- ەكونوميكالىق بايلانىس دامىپ كەلەدى.

«تاراز قالاسىن ۇلى جىبەك جولىنىڭ ورتالىعى دەيدى. سوندىقتان ج و و- نىڭ وسى جەردە سالىنعانىن قالار ەدىم»، - دەدى پەيحۋا ۋنيۆەرسيتەتىنىڭ رەكتورى.