اياق كيىم وكشەسىن قازاقتار ويلاپ تاپقان - كەسكىن
شارا ۇيىمداستىرۋشىلارى «قازاقتىڭ ۇلتتىق كيىمى كۇنىن» كۇنتىزبەگە ەنگىزىپ، ءساۋىر ايىنىڭ سوڭعى جۇماسىندا اتاپ ءوتۋدى عالامتور ارقىلى ۇسىنىپتى. ولاردىڭ بۇل ويىن قولداپ، قوشەمەت كورسەتكەندەر سانىندا شەك بولماعان. توي بارىسىندا كورەرمەندەر كونە ساق، عۇن داۋىرىندەگى كيىم ۇلگىلەرىمەن تانىستى.
توي شەڭبەرىندە «ەل- شاپان» اكسياسى بولىپ ءوتتى. ءبىر اي بويى ەلىمىزدىڭ ءار تۇكپىرىنەن قازاقستان حالقىنا بىرلىك پەن تاتۋلىق لەبىزدەرى جازىلعان ماتا كەسىندىلەرى الماتى قالاسىنا جىبەرىلگەن بولاتىن. سول ماتا كەسىندىلەرىنەن جاس ديزاينەرلەر كوپشىلىك الدىندا «ەل- شاپان» تىكتى.
«قازىر «پيدجاك» دەيمىز عوي، كوستيۋمدى كيىپ جۇرگەن. ونى انگليادا ەمەس، قازاقتار ويلاپ تاپقان كەزىندە. شالباردى، اياق كيىمنىڭ وكشەسىن ءبىز ويلاپ تاپقانبىز. سونى كوبىسى بىلمەيدى. ويىمىز ۇلتتىق ونەردى كوتەرىپ، دامىتۋ»، - دەدى ۇيىمداستىرۋشى، ديزاينەرلەر وداعىنىڭ مۇشەسى ءمۇسىلىم جۇماعاليەۆ.
ۇلتتىق كيىمدەردى برەند قىلۋ ماقساتىن ۇستانعان ۇيىمداستىرۋشىلار ءارتۇرلى ۇلگىدەگى كيىم ۇلگىلەرىن كوپشىلىككە ۇسىندى.
«مەنىڭ ۇستىمدەگى كوستيۋم تۇركى حالىقتارىنىڭ 5- عاسىردا كيگەن كيىمى. بۇل وگىزدىڭ تەرىسىنەن جاۋىنگەرگە ارناپ جاسالىنعان... سونداي-اق ول كەزدە ەر ادامداردىڭ شاشى ۇزىن بولۋى مىندەتتى بولعان. سەبەبى ەر ادام ءوزىنىڭ ورداسىنىڭ الدىندا كىنالى بولسا، ونىڭ شاشىن ەل الدىنا شىعارىپ كەسكەن»، - دەدى مودەل ازات حاليموۆ.
شارانى ۇيىمداستىرۋشىلار وسى كۇننەن باستاپ جىل سايىن قازاقتىڭ ۇلتتىق كيىمى كۇنى مەن ونى تىگۋ شاراسىن داستۇرگە اينالدىرماق. تىگىلگەن ەل- شاپان ەسىك مۇراجايىنا تاپسىرىلدى.