بۇگىن استانادا ءوتىپ جاتقان جەڭىمپازدار فورۋمىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.
«ءبىز دۇنيە جۇزىنىڭ الدىندا تاعى دا ءبىر مارتە ءوزىمىزدىڭ دەموكراتيالىق تۇعىرىمىزدى، ساياسي مادەنيەتىمىزدى كورسەتتىك. دۇنيەجۇزىنەن كەلگەن 850 دەن استام بايقاۋشى، 40 ەلدەن 170 جۋرناليست وسى سايلاۋدى بايقادى، سولاردىڭ الدىندا قازاقستاننىڭ بىرلىگىن، سەنىمىن، قازاقستاننىڭ ىشكى تاتۋلىعىن پاش ەتتىك»، - دەدى ن. نازاربايەۆ.
سونىمەن قاتار ەلباسى شەتەلدەگى قازاقستاننىڭ دوستارى ءوز يگى تىلەكتەرىن ايتىپ، قولداۋلارىن ءبىلدىرىپ جاتقانىنا دا توقتالدى.
«حالىقتىڭ كەزەككە تۇرىپ، تاڭ اتپاستان بالا- شاعاسىمەن سايلاۋ ۋچاسكەلەرىنە كەلىپ، داۋىس بەرگىسى كەلگەنىن مەن كوردىم. ول - زور سەنىم. مۇنداي سەنىم ءار مەملەكەتتە بولا بەرمەيدى. وسى ارقىلى قازاقستان ءوزىنىڭ بىرلىگىن، بولاشاققا دەگەن سەنىمىن، وتانىنا دەگەن سۇيىسپەنشىلىگىن، ماڭگىلىك ەل قۇرا الاتىن كۇش- قۋاتىن كورسەتتى. ەلىمىزدىڭ اسپانى اشىق بولىپ، كوپۇلتتى حالقىمىزدىڭ بىرلىگى جاراسسىن. ماڭگىلىك ەل قۇرۋ ءۇشىن بارشامىز تالماي جۇمىس ىستەيتىن بولامىز»، - دەدى مەملەكەت باسشىسى.
اۆتور: قانات مامەتقازى ۇلى