مانشۇك مامەتوۆامەن بىرگە وقىعان شىرىنكۇل اجە پرەزيدەنت سايلاۋىندا داۋىس بەردى
داۋىس بەرۋگە ارنالعان سپورت زال كۇردەلى جوندەۋدەن وتكەن. سىرتقى ماڭدايشادا ورنالاسقان ەلەكتروندى تابلوداعى بيىلعى بيىك بەلەستەر جىلىنا بايلانىستى قاناتتى سوزدەردىڭ ءوزى سايلاۋ ءمانىن اشىپ تۇرعانداي. پاتريوتتىق اندەر شىرقالىپ، راديوحابار بەرىلىپ جاتىر.
سايلاۋشىلاردىڭ كوللەدجدەگى «ەرلىك» زالىمەن ءجۇرىپ ءوتۋىنىڭ ءوزى دە ءاربىر جاننىڭ سوعىس جانە تىل ارداگەرلەرىنە دەگەن قۇرمەتىن ارتتىرا تۇسەدى.
بۇل كۇنى، ەرەكشە ايتا كەتەتىن وقيعا - كوميسسيا مۇشەلەرىنىڭ ۋچاسكە ايماعىنداعى ەڭ قارت سايلاۋشى، 95 جاستاعى احمەتوۆا شىرىنكۇلدىڭ ۇيىنە بارىپ، ول كىسىنىڭ سايلاۋ قۇقىعىنا جاعداي جاساۋى بولدى. ويتكەنى، شىرىنكۇل اجەي - كەڭەس وداعىنىڭ باتىرى مانشۇك مامەتوۆامەن الماتىداعى مەديتسينالىق ينستيتۋتتىڭ دايارلىق كۋرسىندا بىرگە وقىعان جان. بۇل تاريحي ءسات كوللەدج ەسىمى بەرىلگەن قازاقتىڭ باتىر قىزىنىڭ دا تاعدىرىمەن بايلانىسىپ جاتقاندىعىمەن ماڭىزدى بولسا كەرەك.
وسى تۇستا قازاقستان حالقى بىرلىگى كۇنى مەن ۇلى جەڭىستىڭ 70 جىلدىق مەرەكەسى قارساڭىنداعى سايلاۋعا ۇجىم باسشىسىنىڭ قولداۋىمەن باتىر قىز اتىنداعى ءبىلىم ورداسى ۇستازدار قاۋىمىنىڭ دا ۇلكەن جاۋاپكەرشىلىكپەن ءمان بەرگەنىن ايتا كەتكەن ءجون.
وقىتۋشىلار ستۋدەنتتەرگە الدىن-الا سايلاۋ زاڭدىلىعىن ءتۇسىندىرىپ، ولاردىڭ ساياسي كوزقاراسى مەن ساياسي مادەنيەتىنىڭ قالىپتاسۋىنا بارىنشا ىقپال ەتتى. بىرنەشە رەت اقپاراتتىق- تانىمدىق، ساياسي ساباقتار وتكىزىلدى.
مىنە، سونىڭ ناتيجەسىندە كوللەدج جاتاقحاناسىندا جاتاتىن 106 ستۋدەنت تاڭعى ساعات 7:00 دە كەلىپ، العاشقىلار قاتارىندا داۋىس بەردى. كوللەدج ستۋدەنتى - قىتايدىڭ نانجيڭ قالاسىندا وتكەن جاسوسپىرىمدەر اراسىنداعى دزيۋدودان وليمپيادا چەمپيونى جاۋىنتايەۆ باۋىرجاننىڭ قازاقستان حالقى اسسامبلەياسىنىڭ ХХІІ سەسسياسىنا قاتىسۋ قۇرمەتىنە يە بولۋى دا جاستاردىڭ سايلاۋ الدىنداعى رۋحىن كوتەردى دەسە بولعانداي.
№203 ۋچاسكەدە سايلاۋ بارىسىنىڭ قالىپتى، كەدەرگىسىز، بەلسەندى تۇردە ءوتىپ جاتقانىنا كوز جەتتى. مۇنىڭ ءبارى دە بىرلىك پەن ۇيىمشىلدىقتىڭ، ساياسي مادەنيەتتىڭ ۇلگىسى، كوللەدجدەگى جاعىمدى احۋالدىڭ ارقاسى. تاعى ءبىر ەرەكشە ءمان بەرىپ ايتا كەتەرلىك ماسەلە - ۋچاسكە قامتيتىن ايماقتىڭ وزىندىك ەرەكشەلىگى.
ناقتىراق ايتقاندا، مۇندا كوپ ۇلتتىڭ وكىلى تۇرادى. ولار اسا بەلسەندىلىك تانىتىپ، داۋىس بەرۋدە العاشقىلاردىڭ ءبىرى بولعانى قۋانتتى. ەرلى- زايىپتى سەپكوۆا ولگا الەكسەيەۆنا مەن كاراباحتسييەۆ اركاديي ۆيتاليەۆيچ داۋىس بەرىپ بولعان سوڭ، قۋانىشتى كوڭىل- كۇيىمەن ءبولىستى.
«ءبىزدىڭ ءبىر عانا وتانىمىز بار، ول - قازاقستان، سوندىقتان ەلىمىزدىڭ بولاشاعى ءبىز ءۇشىن اسا ماڭىزدى. قانشاما جىلدار بويى وسى سىر توپىراعىندا ءتاتۋ- ءتاتتى ءومىر ءسۇرىپ كەلەمىز. ءبىز ۇنەمى وسى ۋچاسكەدەن داۋىس بەرەمىز. بۇل جولى ءتىپتى، ءبارى دە ەرەكشە. عيماراتقا كىرىپ كەلگەندەگى كورىنىس جانعا جايلى. داۋىس بەرەتىن جەر وتە ىڭعايلى جانە كەڭ. اينالا تاپ- تازا، ادەمى گۇلدەر، ىزەتتى قارسى الۋشىلاردىڭ مادەنيەتىنەن وقۋ ورنىنىڭ سايلاۋعا جاقسى دايىندالعانى كورىنىپ تۇر»، - دەدى قۋانىشتى جۇپ.
ءيا، سايلاۋشى ءسوزىنىڭ جانى بار. سايلاۋشىلاردىڭ داۋىس بەرۋىنە جاسالعان جاعدايلاردىڭ ءبارى دە ولارعا جاعىمدى اسەر قالدىرادى. كوللەدج ۇجىمى سايلاۋ ناۋقانىندا ءبىر كىسىدەي جۇمىلىپ تۇسكە دەيىن- اق ءجۇز پايىز داۋىس بەردى.
اتالعان سايلاۋ كوميسسياسىنىڭ حاتشىسى ساۋلە كوزدىبايەۆا جانۇياسىمەن بىرگە كەلىپ، داۋىس بەرىپ جاتقان وتباسىلاردىڭ كوپ ەكەنىن ايتتى.
«مۇنىڭ ءوزى حالىقتىڭ ساياسي دا رۋحاني بەلسەندىلىگىنىڭ وسكەندىگى جانە ەلىنىڭ بولاشاعىنا بەي- جاي قارامايتىندىعى دەپ تۇسىنەمىن»، - دەدى ول.
ەسكە سالا كەتەيىك، مۇنداعى جالپى سايلاۋشىلار سانى - 1710 ادام. باقىلاۋشىلار سانى دا كوپ، ولار دا ءوز مىندەتىنە ۇلكەن جاۋاپكەرشىلىكپەن قاراپ، سايلاۋ بارىسىن ءجىتى قاداعالادى. وسىنداي ۇيىمشىلدىق ەل بىرلىگىنىڭ جارقىن ۇلگىسىندەي.
اۆتور: ەلۋباي اۋەزوۆ