قازاقستاندا جاقىن كەلەشەكتە تەحنيكالىق ماماندارعا دەگەن سۇرانىس وسە تۇسپەك

استانا. قازاقپارات - جاقىن كەلەشەكتە ەلىمىزدە تەحنيكالىق ماماندارعا، جوعارى بىلىكتى جۇمىسشىلارعا دەگەن سۇرانىس ساقتالىپ، وسە تۇسپەك. «اتامەكەن» ۇلتتىق كاسىپكەرلەر پالاتاسى ادامي كاپيتالدى دامىتۋ دەپارتامەنتىنىڭ ساراپشىلارى وسىنداي پىكىرگە كەلىپ وتىر.

 ۇلتتىق كاسىپكەرلەر پالاتاسى ادامي كاپيتالدى دامىتۋ دەپارتامەنتىنىڭ ديرەكتورى ءلاززات شونايەۆانىڭ پىكىرىنە قاراعاندا، الداعى ۋاقىتتا ورتا بۋىندى ينجەنەرلەر مەن بىلىكتى جۇمىسشىلارعا سۇرانىس ارتا تۇسپەك.

«ءبىزدىڭ ەلىمىزدىڭ ۇستانعان جالپىلاما ساياساتىنا سۇيەنسەك، بۇل يننوۆاتسيالىق تەحنولوگيالار مەن ەكونوميكانىڭ ونەركاسىپتىك سەكتورىن دامىتۋعا نەگىزدەلەدى. ونداي بولسا، تەحنيكالىق ماماندار: ينجەنەرلەر، جۇيەلىك اكىمشىلىك قىزمەتشىلەر، تەحنيكالىق ءبولىم شەبەرلەرى، مەحانيكتەر مەن ەنەرگەتيكتەر سۇرانىسقا يە بولا تۇسەدى»، - دەپ سانايدى ءلاززات شونايەۆا.

 ونىڭ ايتۋىنشا، ورتا بۋىن ينجەنەرلەر مەن بىلىكتى جۇمىسشىلار سۇرانىسىنا قاتىستى قازاقستاندىق ەڭبەك نارىعىندا ءبىراز جىلدار بويى سايكەسسىزدىك ورىن الىپ وتىر. ال جۇرگىزىلگەن زەرتتەۋلەر، ەكونوميكانىڭ كۇردەلى احۋالىنا قاراماستان، ەلىمىزدىڭ كوپتەگەن ونەركاسىپتىك كاسىپورىندارىندا مامانداردىڭ، اسىرەسە جۇمىسشىلاردىڭ جەتىسپەۋشىلىگى ءبىلىنىپ وتىر. الايدا، ءوندىرىستى اۆتوماتتاندىرۋ جانە جاڭا تەحنولوگيالاردى ەنگىزۋ ناتيجەسىندە بۇگىنگى كۇنى وندىرىستە جوعارى بىلىكتى قىزمەتكەر پەرسونالدار تالاپ ەتىلە باستادى. سوندىقتان دا، ساراپشىلار جاقىن ارالىقتا تەحنيكا ماماندارىنا، جوعارى بىلىكتى جۇمىسشىلارعا، توكارلارعا سۇرانىس ارتادى، ءبىراق ولار جاڭا فورماتسيادا بولۋى شارت دەگەندى العا تارتادى.

اۆتور: قانات مامەتقازى ۇلى