قىزىلوردالىقتارعا تەگىن جەر تەلىمى ۇلەستىرىلۋدە

استانا. قازاقپارات - قىزىلوردا قالاسىنىڭ تۇرعىندارىنا جەر تەلىمى ۇلەستىرىلە باستادى.

ەندى شاھارداعى ءار وتباسى قالا ماڭىنداعى قاراتابان اۋماعىنان جەر الىپ، باۋ-باقشا وسىرە الادى. قالالىق اكىمشىلىك بۇل ماقساتتا 50 گەكتارداي جەر تەلىمىن بولگەن.

كوكونىس پەن باقشالىق ونىمدەردى ەگىپ، قىس ازىعىن قامداۋ ءۇشىن بەرىلگەن مۇنداي مۇمكىندىكتى پايدالانعىسى كەلەتىندەر قاراسى كوپ. سولاردىڭ ءبىرى - رۋسلان مۇحامەدالى. جەرگىلىكتى باسىلىمنان حابارلاندىرۋ وقىعان قالا تۇرعىنى العاشقىلاردىڭ ءبىرى بولىپ قاراتاباننان تەلىم الىپتى.

«كوكونىستىڭ بارلىق ءتۇرىن بازاردان ساتىپ الامىز. بۇل وتباسى بيۋدجەتىنە كادىمگىدەي سالماق، ەندى جەر الىپ، ءتۇرلى ءونىم ەگىپ، قىستىق ازىقتى ءوزىمىز قامدايتىن بولدىق»، - دەيدى رۋسلان. ول حيمياسىز، تازا كوكونىس پەن باقشا داقىلدارىن وسىرەمىن دەپ 30 سوتىق جەر العان. باۋ-باقشا ونىمدەرىن ەگۋگە ارنالعان اۋماقتا سۋ ماسەلەسى تولىق شەشىلىپتى. قالا بيلىگى ءتىپتى اۋماقتى قورشاپ تا بەرگەن. قىزىلوردالىقتارعا تەك ەرىنبەي ەڭبەك ەتۋ عانا قالىپ وتىر.

اقسۋات ەلدى مەكەنىنە قاراستى قاراتابان القابى قالادان 12 شاقىرىم قاشىقتىقتا. «كەزىندە كوكونىس ەگىلگەن بۇل القاپتىڭ ونىمدىلىگى جوعارى، جەرى قۇنارلى»، - دەيدى قالانىڭ باس اگرونومى. تۇقىمدى جەر جالداۋشىلار وزدەرى تابادى. ءار وتباسى ءوز مۇمكىنشىلىگىنە قاراي ون نەمەسە جيىرما، وتىز، ءتىپتى ەلۋ سوتىققا دەيىن جەردى جالداي الادى.

ءبىر ايتا كەتەرلىگى، باقشالىق جەر تەگىن جانە تەك ءبىر ەگىس ناۋقانىنا عانا بەرىلەدى. جەرگىلىكتى بيلىك كولىك ماسەلەسىن دە شەشىپ قويعان. اۋىل شارۋاشىلىعى بولىمىندەگى ماماندار ايتۋىنشا، كوكونىس ەگىپ، ءونىمدى جيناپ بولعانشا، ارنايى اۆتوبۋستار قالا مەن ەگىس القابى اراسىندا تۇراقتى تۇردە قاتىناماق.
«تۇركىستان»