ب. ساپاربايەۆ قاراعاندى وبلىسى اكىمدىگىنە الەۋمەتتىك شيەلەنىستى بولجاۋ كارتاسىن ازىرلەۋدى ۇسىندى - فوتو

 استانا. قازاقپارات - بۇگىن ق ر پرەمەر- ءمينيسترىنىڭ ورىنباسارى بەردىبەك ساپاربايەۆ مەملەكەت باسشىسىنىڭ تاپسىرماسىمەن قاراعاندى وبلىسىنا جۇمىس ساپارىن جاسادى.

ساپار بارىسىندا ۆيسە- پرەمەر ءوڭىردىڭ، ونىڭ ىشىندە بالقاش، پريوزەرسك جانە جەزقازعان قالالارىنىڭ الەۋمەتتىك دامۋىمەن تانىسىپ، ۇتقىر توپتارمەن كەزدەستى جانە وبلىستاعى پروبلەمالىق ماسەلەلەر بويىنشا كەڭەس وتكىزدى.

ب. ساپاربايەۆ بالقاش قالاسىندا № 15 مەكتەپ ليتسەيدە، «100 مەكتەپ، ¬100 اۋرحانا» باعدارلاماسى اياسىندا سالىنعان «ەر توستىك» بالاباقشاسىندا جانە «قازاق مىس» كورپوراتسياسىنىڭ ءتۇرلى ونەركاسىپتىك ماماندىقتار بويىنشا دۋالدى وقىتۋ فورماتى ەنگىزىلگەن پوليتەحنيكالىق كوللەدجىندە بولدى. ۆيتسە- پرەمەرگە وقۋشىلاردى وقۋلىقتارمەن قامتاماسىز ەتۋدى مونيتورينگىلەۋدىڭ ەلەكتروندى جۇيەسى تانىستىرىلدى. وسى جەردە ب. ساپاربايەۆ قالالىق قۇرىلىمداردىڭ باسشىلارىمەن كەزدەسۋ وتكىزىپ، وندا الەۋمەتتىك تۇيتكىلدى ماسەلەلەر كەڭىنەن تالقىلاندى.

 ۇكىمەت باسشىسىنىڭ ورىنباسارى پريوزەرسكىدە تاياۋدا عانا سالىنعان «بالقاش» ەمدەۋ- ساۋىقتىرۋ كەشەنى مەن 1000-نان باستام بالا ءبىلىم الىپ جاتقان ونەر جانە سپورت مەكتەبىندە بولىپ، دەنساۋلىق ساقتاۋ جانە ءبىلىم بەرۋ ماسەلەسى تاعى دا قوزعالدى.

ب. ساپاربايەۆ ءوز سوزىندە بۇل كەشەننىڭ پريوزەرسەك قالاسى ءۇشىن ماڭىزدىلىعىن اتاپ ءوتتى.

«زاماناۋي قۇرال- جابدىقتار مەن بىلىكتى دارىگەرلەردىڭ ارقاسىندا قالا تۇرعىندارى مەن قوناقتارى وزدەرىنىڭ دەنساۋلىقتارى مەن كۇش- قۋاتتارىن قالپىنا كەلتىرۋگە بىرەگەي مۇمكىندىك الىپ وتىر. شيپاجاي وڭىردەگى حالىققا الەۋمەتتىك قىزمەت كورسەتۋ دەڭگەيىن ارتتىرۋداعى ماڭىزدى قادامداردىڭ بىرىنە اينالدى» ، - دەدى ول.

 كەشەن قۇرىلىمىنا ەمدەۋ جانە سپورت كورپۋسى، كىتاپحانا، كينوكونتسەرت زالى، بالالاردىڭ كوڭىل كوتەرۋ ورتالىعى كىرەدى. ول 150 ادامعا ارنالعان. مەملەكەتتىك جەكە سەرىكتەستىك اياسىندا (5,2 ميلليارد تەڭگە) سالىنعان اتالعان نىساندى پايدالانۋعا بەرۋدىڭ ناتيجەسىندە 185 جۇمىس ورنى قۇرىلدى.

 تۇستەن كەيىن ۆيتسە- پرەمەر جەزقازعان قالاسىنداعى ءبىرقاتار الەۋمەتتىك سالا نىسانىندا بولىپ، جەزدى ەلدى مەكەندە ۇتقىر توپتىڭ جۇمىسىمەن تانىستى. اتالعان توپتىڭ نەگىزگى مىندەتى شالعايداعى ەلدى مەكەن تۇرعىندارىنا «جۇمىسپەن قامتۋ -2020» باعدارلاماسىنىڭ نەگىزى تارماقتارىن تانىستىرۋ ءارى زەينەتاقى مەن الەۋمەتتىك جاردەماقىلاردى الۋعا قولۇشىن بەرۋ بولىپ تابىلادى.

جۇمىس ساپارى جۇمىس ورىندارىنىڭ قىسقارتىلۋىنا جول بەرمەۋ جانە الەۋمەتتىك تۇراقتىلىقتى ساقتاۋ جونىندەگى ءۇشجاقتى مەموراندۋمداردىڭ ورىندالۋى ماسەلەرىنە ارنالعان جيىنمەن اياقتالدى.

 وتىرىسقا قاتىسۋشىلار الدىندا ءسوز سويلەگەن ب. ساپاربايەۆ ولاردىڭ باستى نازارىن مەملەكەت باسشىسىنىڭ تاپسىرمالارىن دەر ۋاقىتىندا ءارى ساپالى ورىنداۋ قاجەتتىگىنە اۋداردى. «بۇل ماسەلەلەر الەۋمەتتىك سەرىكتەستىك جونىندەگى رەسپۋبليكالىق ءۇشجاقتى كوميسسيا تارابىنان ەرەكشە نازارعا الىنعان. قاراعاندى وبلىسى الەۋمەتتىك شيەلەنىس كارتاسى بويىنشا تاۋەكەلى جوعارى ايماققا جاتاتىندىعىن مويىنداۋ كەرەك»، - دەپ اتاپ ءوتتى ۆيتسە- پرەمەر.

ونىڭ پايىمىنشا، مۇنداي جايتقا مەموراندۋمدارعا قول قويعان كەيبىر جۇمىس بەرۋشىلەردىڭ ءوز مىندەتتەمەلەرىن ورىنداماۋى جانە ەڭبەك زاڭناماسىنىڭ بۇزىلۋى تۇرتكى بولىپ وتىر. بۇل اسىرەسە، «ارسەلور ميتتال تەمىرتاۋ» ، «گەفەست» كومپانيالار توبى سىندى تاۋ كەن ءوندىرىسى سالاسىنداعى كاسىپورىندارعا قاتىستى.

 وسىعان وراي ول وبلىستىق اكىمدىككە سالالار بويىنشا الەۋمەتتىك شيەلەنىستى بولجاۋ جانە ونىڭ تۋىنداۋ سەبەپتەرىن دەر ۋاقىتىندا انىقتاۋ كارتاسىن ازىرلەۋدى، سونىمەن بىرگە مەموراندۋمدار شارتتارىنىڭ جۇمىس بەرۋشىلەر تارابىنان ورىندالۋىن باقىلاۋعا الۋدى تاپسىردى.

جيىندى قورىتىندىلاعان ب. ساپاربايەۆ الەۋمەتتىك تۇراقتىلىقتى ساقتاۋ ءوڭىر بيلىگىنىڭ باسىمدىقتى مىندەتى ەكەندىگىن باسا ايتتى.

 پرەمەر- ءمينيستردىڭ ورىنباسارى سۋ تاسقىنى ماسەلەسىنە دە ەرەكشە نازار اۋداردى.

«مەملەكەت باسشىسىنىڭ تاپسىرماسىنا سايكەس ۇكىمەت ەلىمىزدىڭ ءبىرقاتار وڭىرلەرىندە ورىن الىپ وتىرعان سۋ تاسقىنىن باقىلاۋ جانە تۇراقتاندىرۋ بويىنشا بارلىق شارالاردى قابىلداۋدا. قازىرگى ۋاقىتتا ۇكىمەتتىڭ قورىنان قوسىمشا قارجى رەسۋرستارىن ءبولۋ جانە دەمەۋشىلىك كومەكتەردى تارتۋ ماسەلەسى قاراستىرىلۋدا»، - دەدى ب. ساپاربايەۆ.