سوت تاريحىن ءالى دە عىلىمي تۇرعىدا زەرتتەۋ قاجەت - ت. بارپىبايەۆ
كونفەرەنسيانى استانا قالالىق سوتىنىڭ ءتوراعاسى تىلەكتەس بارپىبايەۆ اشىپ، قاسىم حان، ەسىم حان، تاۋكە حاندار مەن اتاقتى بيلەردىڭ وزگە ەلدەرمەن قارىم- قاتىناس ورناتۋداعى ديپلوماتيالىق قىزمەتتەرى جايىندا تاريحي مازمۇنداعى بايانداما جاسادى.
كونفەرەنسيادا قازاق حاندىعىن قالىپتاستىرۋ مەن نىعايتۋداعى قازاق ەلىنىڭ قۇقىعى، بيلەر سوتىنىڭ تورەلىگى، دالا زاڭدارىنىڭ مەملەكەتتىك بيلىكتى دامىتۋداعى ماڭىزى، مەملەكەت باسقارۋداعى حاندار مەن سۇلتانداردىڭ ءرولى، بيلەردىڭ زاڭ شىعارۋ قۇقىعى، بيلەردىڭ سوت تورەلىگىن جۇرگىزۋدەگى ادىلدىگى جانە تاۋەلسىزدىگى، قازاق بيلەر سوتىنىڭ بىتىمگەرلىك ءرولى جايىنداعى عىلىمي ماقالالار تالقىلاندى.
«بيلەر سوتىنىڭ ادىلدىك پرينتسيپى - تاۋەلسىز ەلىمىزدىڭ سوت جۇيەسىنىڭ الەمدىك ستاندارتقا ساي دامۋىنا سەپتىگىن تيگىزگەنى انىق. بيلەر شىعارعان زاڭ- ەرەجەلەر مەن ۇكىم- شەشىمدەردىڭ قازىرگى كونستيتۋتسيادان، قىلمىستىق، ازاماتتىق كودەكستەردەن، وزگە دە زاڭداردان كورىنىس تابۋى، قازاق بيلەرى جۇرگىزگەن ءادىل سوت تاجىريبەسىنە سۇيەنە وتىرىپ، قازىرگى سوت جۇيەسىن جەتىلدىرۋدىڭ وزەكتى پروبلەمالارىنىڭ تالقىلانۋى ءالى دە ءداستۇرلى قازاق قۇقىعىن، بيلەر ينستيتۋتىن، سوت تاريحىن عىلىمي تۇرعىدان زەرتتەۋدى، زەردەلەۋدى تالاپ ەتەدى»، - دەدى ول.
جيىن بارىسىندا سونىمەن قاتار، قازاق حاندىعىنىڭ 550 جىلدىعىنا ارنالعان حرونولوگيالىق بەينە سيۋجەت كورسەتىلدى. بەينە باياندا الاش جۇرتىنىڭ ازاتتىق جولىنداعى ازاپ پەن قايعىعا تولى زوبالاڭ كەزەڭدەرى تاريحي دەرەكتەرمەن بەينەلەنىپ، قازاق ەلىنىڭ ازاتتىق جولىنداعى تاعدىرى سۋرەتتەلگەن.