الەۋمەتتىك جەلى ونەر جۇلدىزدارىنىڭ قادىرىن قاشىردى
«ينستاگرام» پايدا بولعالى الەۋمەتتىك جەلى الەمىندە ءومىر سۇرەتىن ونەر يەلەرى كوزدەرىن تىرناپ اشقاننان، ۇيقىعا كەتكەنگە دەيىنگى ءاربىر ءىس- ارەكەتتەرىن كوپشىلىكپەن ءبولىسىپ، «لايك» جيناۋمەن ۋاقىت وتكىزەدى. بۇگىن «الاش ايناسى» ينستگارامداعى جۇلدىزدار ءومىرى تۋرالى ءسوز قوزعاپ وتىر.
شوۋ- بيزنەس جۇلدىزدارى زاماننىڭ تالابى وسى ەكەن دەپ جاپپاي الەۋمەتتىك جەلىگە قوسىلىپ العانىن جاقسى بىلەمىز. ارينە، مۇنىڭ جاقسىلىعى دا جوق ەمەس. ونەر ادامدارى حالىققا جاقىن بولادى، ولاردىڭ تىڭدارماندارى مەن كورەرمەندەرى دە وزدەرىنىڭ سۇيىكتى ارتىستەرىنىڭ ءومىرىن ءجىتى باقىلاپ وتىرادى دەگەندەي. دەگەنمەن الەۋمەتتىك جەلى بىرتىندەپ جامان ادەتكە اينلىپ كەتكەنى دە شىندىق. «اۋرۋ قالسا دا، ادەت قالمايدى عوي» ، قازىر انشىلدەر تەك ساحناعا قالتافونسىز شىعادى، قالعان ۋاقىتتا قولدارىنان قالتافوندارىن تاستاماي، سەلفيلەتىپ، ينستاگرامعا سالىپ جاتقانى.
اسحانادا، گريم جاسايتىن بولمەدە، مەيرامحانادا، تويدا، كونتسەرتتە، ۇيدە، قىسقاسى تابانى تيگەن جەردىڭ بارىندە سۋرەتكە ءتۇسىپ، تاماق ءىشىپ وتىرمىن، كيىم ساتىپ الدىم، بالەنشەنىڭ تويىنا باردىم، شەتەلدە ءجۇرمىن دەپ ينستاگرامداعى لەنتاسىن تولتىرۋمەن كۇنى بويى تىنىم تاپپايدى.
قاراپايىم كورەرمەن ءانشى، ارتىستەردى ساحنادان كورىپ، ونەرىنە تامسانۋدىڭ ورنىنا، كۇندەلىكتى كۇيبەڭ تىرشىلىگىنە كۋا بولۋدان دا جالىققانداي. نە نارسە شەكتەن اسىپ، ارتىقتاۋ بولسا، كوپشىلىكتى جالىقتىرادى ەمەس پە. بۇعان دەيىن قالىڭ جۇرتشىلىققا جۇلدىزداردىڭ جەكە ءومىرى قىزىق بولسا، قازىر ونەردەگى باسەكەلەستىكتەرى قاتتى قىزىقتىرادى.
قازاق ەستراداسىنداعى ءبىراز جۇلدىزدارىمىزدىڭ ءوزى جۇرتتىڭ الدىندا قادىر- قاسيەتتەرىن جوعالتىپ العاندارىن مويىندايدى.
ايتالىق، بەلگىلى ءانشى اقبوتا كەرىمبەكوۆا تەلەارنالاردىڭ بىرىنە بەرگەن سۇقباتىندا «زامان تالابىنا ساي بولامىز دەپ الەۋمەتتىك جەلىگە تاۋەلدى بولىپ قالعانىمىزدى مويىندايمىز. سوندىقتان دا قازىرگى تاڭدا ونەر ادامدارىنىڭ قادىرى قاشتى. الەۋمەتتىك جەلىدە وتىرعان ۇلكەنى بار، كىشىسى بار بىزگە ويلارىنا كەلگەندى ايتىپ، ءتىپتى كوڭىلىمىزگە كەلەتىن سوزدەردى جازادى. بۇعان ءوزىمىز دە كىنالىمىز» ، دەيدى.
قازاق ەستراداسىنىڭ جارىق جۇلدىزى ماقپال ءجۇنىسوۆا اپايىمىز دا جاستاردان قالىسپاي ينستاگرامعا تىركەلگەن بولاتىن. الايدا الەۋمەتتىك جەلىدە ماقپال اپايعا قاراتىپ جازىلعان نەبىر جاعىمسىز پىكىرلەر ءانشىنىڭ قىزىنا ۇناماسا كەرەك، اناسىنىڭ جەكە پاراقشاسىن ءوشىرىپ تاستاپتى. ال بۇعان ماقپال اپاي اسا قىنجىلا قويماعان. قايتا «الەۋمەتتىك جەلى بارلىق ۋاقىتىمدى الىپ، ءتىپتى ونەرىمە ءتيىستى كوڭىل بولە الماي قالىپ ەدىم دەيدى ءانشى.
قازىرگى كەزدە ينستاگرامعا تىركەلمەگەن انشىلەر ساۋساقپەن سانارلىق. سولاردىڭ ءبىرى مەدەۋ ارىنبايەۆ. ويتكەنى مەدەۋ مىرزا ءوزىنىڭ جاڭا تەحنولوگيالار ءتىلىن مەڭگەرمەگەنىن، ايتەۋىر تەلەفوندى تەك بايلانىس قۇرالى رەتىندە پايدالاناتىنىن ايتادى. دەگەنمەن ءانشىنىڭ كومەكشىسى مەدەۋ اعانىڭ بۇل كەمشىلىگىن بىلدىرتپەۋ ءۇشىن ونىڭ اتىنان جەكە پاراقشا اشىپ، جۇرتشىلىقپەن تىلدەسىپ وتىراتىن كورىنەدى.
سونىمەن انشىلەردىڭ الەۋمەتتىك جەلىگە تاۋەلدىلىكتەرى سونشالىق، ءبىرىنىڭ پاراقشاسىن ءبىرى جارنامالاپ، وقىرمان جيناپ الەك بولادى دا جۇرەدى. وزدەرى مىڭداعان وقىرماندى جيناپ الادى دا، ارا- اراسىندا ايتىلعان جاعىمسىز پىكىرىلەرگە ءتىپتى وكپەلەپ تە قالادى. « قىزىل ورىكتى» شىرقاپ، تويدىڭ كوركىن قىزدىراتىن اقىلبەك جەمەنەي مىرزا كەيبىر وقىرماندارىنا ىزا بولعانى سونشالىق، ءتىپتى تەلەفوننان سۋىرىپ الىپ، سويلەسكىسى كەلەتىنىن دە جاسىرمايدى.
انشىلەردىڭ قىتىعىنا قالاي ءتيۋدى وقىرماندار دا «جاقسى» مەڭگەرىپ كەلەدى. سوعان قاراعاندا شىنىمەن دە ونەر جۇلدىزدارىنىڭ قادىرى كەتكەن سەكىلدى. قانشا جەردەن سىرتتان ايتىلعان سوزدەرگە، سۋرەتتەرىنىڭ استىنا جازىلعان جاعىمسىز پىكىرگە كوڭىل اۋدارمايمىز دەگەنمەن، جۇلدىزدار ءاربىر باسىلعان لايكقا ماساتتانىپ، وزدەرىن ماقتايتىنداردىڭ سانى كوبەيگەنىن قالايتىنىن جاسىرا المايدى.
اۆتور: اينۇر نۇرسابەت
«الاش ايناسى»