توكيو كوشەلەرىندە كولىكتىڭ جاڭا ءتۇرى پايدا بولادى

استانا. قازاقپارات - ءۇش دوڭگەلەكتى i-Road ەلەكتر قۋاتىمەن جۇرەتىن كولىكتى 15 مينۋتتان باستاپ، 2,5 ساعاتقا دەيىن جالعا الىپ، كەيىن ارنايى 5 تۇراقتىڭ بىرەۋىنە قويىپ كەتۋگە بولادى، - دەپ حابارلايدى khabar.kz.

وسىلايشا Toyota كومپانياسى ءىرى شاھارداعى كولىك كەپتەلىسىنىڭ ماسەلەسىن شەشىپ، اۋانىڭ لاستانۋىنا قارسى كۇرەسكە ۇلەس قوسقالى وتىر. ازىرگە بۇل تاجىريبەگە بىرنەشە كولىك قانا قاتىستىرىلماق.

تەمىر تۇلپارلار ىسكەر ورتالىقتار مەن توكيونىڭ باسقا دا كورنەكتى جەرلەرىنە ورنالاستىرىلادى دەپ جوسپارلانۋدا. شاعىن كولىكتىڭ ۇزىندىعى 2 مەتردەن اسادى، ال ەنى نە بارى 87 سانتيمەتر.
اكيحيرو ياناي، Toyota كومپانياسىنىڭ وكىلى:

- بىرىنشىدەن، كەرەمەت كولىكتى جۇرگىزىپ، راحاتقا بولەنەسىز. ەكىنشىدەن، ول وتە شاعىن. سوندىقتان تۇراققا قويۋعا جانە بۇرىلىس جاساۋعا ىڭعايلى. ۇشىنشىدەن، موتوتسيكلدەن دە قولايلى. وسىنىڭ بارلىعى - حالقى وتە تىعىز ءىرى قالادا اسا ماڭىزدى ەرەكشەلىكتەر.