الماتىدا الەم چەمپيوناتى وتۋدە

استانا. قازاقپارات - بۇل كۇندەرى الماتىداعى بالۋان شولاق اتىنداعى سپورت سارايىندا توعىزقۇمالاقتان الەم چەمپيوناتى ءوتىپ جاتىر.

تورتكۇل دۇنيەنىڭ 20 دان اسا مەملەكەتىنەن جينالعان جارىس 17 -ساۋىرگە دەيىن سوزىلادى.

 جارىس ەرلەر مەن ايەلدەر اراسىندا ادەتتەگىدەي توعىزقۇمالاقتىڭ كلاسسيكالىق ءتۇرى جانە راپيد پەن بليتستەن وتەدى.

قازاق ەلى نامىسىن بۇل جارىستا سەگىز سپورتشى قورعايدى. ولاردىڭ بارلىعى دا كوپتەگەن بايراقتى باسەكەلەردە تابىستى ونەر كورسەتىپ جۇرگەن ءوز ءىسىنىڭ مايتالماندارى.

وزگە مەملەكەتتەردەن كەلگەندەر اراسىندا دا ءدۇبىرلى دودالاردا مول تاجىريبە جيعان سپورتشىلار از ەمەس. بارلىعىنىڭ دا ماقساتى -  الماتىداعى جارىستا بارىنشا تابىستى ونەر كورسەتىپ، جۇلدەلى ورىنداردىڭ بىرىنە ىلىگۋ.

توعىزقۇمالاقتان الەم چەمپيوناتىنىڭ تۇساۋى 2010 -جىلى كەسىلگەن بولاتىن. استانادا وتكەن ايتۋلى جارىستا عالىمجان تەمىربايەۆ پەن اسەل دالييەۆا قوس التىننان ولجالاپ، وزگە قارسىلاستارىنىڭ بارلىعىن شاڭ قاپتىرىپ كەتكەنى ەسىمىزدە. 2012-2014 -جىلدارداعى دۇنيەجۇزىلىك دودا چەحيانىڭ پاردۋبيتسە قالاسىندا ۇيىمداستىرىلدى. بۇل باسەكەلەردە ايدوس سەيىتجان، جانات قايمۇلدين، سەرىك اقتايەۆ، حاكىمجان ەلەۋسىنوۆ، نۇربەك قابيەۆ، اسەل داليەۆا، ديانا كەنينا باس جۇلدەنى ولجالاسا، تاعى بىرنەشە قانداسىمىز جۇلدەگەرلەر ساناتىنا قوسىلدى.

سول سەكىلدى قۇبان سازايەۆ، اناربەك جاماكەيەۆ، ميرلان قۇدايبەرگەنوۆ جانە گۇلجامال سارىكەيەۆا سىندى الاتاۋدىڭ ارعى جاعىنان كەلگەن قىرعىز باۋىرلارىمىز دا جەڭىس تۇعىرىنا كوتەرىلدى.

 بۇل كۇندەرى توعىزقۇمالاققا دەگەن قىزىعۋشىلىق كۇرت ارتىپ وتىر. تەك ازيا ەلدەرى عانا ەمەس، ەۋروپا مەن امەريكا قۇرلىعىنىڭ وكىلدەرى دە قازاقتىڭ ۇلتتىق ونەرىن مەڭگەرۋگە ەرەكشە قۇلشىنىس تانىتۋدا. العىرلىق پەن تاپقىرلىقتى تالاپ ەتەتىن سپورتتىڭ بۇل ءتۇرى 2006 -جىلى -  لوندوندا، 2007 -جىلى -  پاردۋبيتسەدە جانە 2009 -جىلى كانادادا وتكەن دۇنيەجۇزىلىك زياتكەرلىك فەستيۆالدارى مەن وليمپيادالاردىڭ باعدارلامالار كەستەسىنە كىرگىزىلگەن. بۇگىنگى تاڭدا توعىزقۇمالاقپەن شۇعىلداناتىن سپورتشىلاردىڭ سانى 100 مىڭنان استى.

عالىم سۇلەيمەن

«ايقىن»