مەملەكەتتىك حاتشى جاستاردى «تىراۋلاپ ۇشقان تىرنالار» قويىلىمىن تاماشالاۋعا شاقىردى - فوتو
جەڭىستىڭ 70 جىلدىق مەرەيتويىنىڭ قارساڭىندا رەجيسسەر تالعات تەمەنوۆ ساحنالاپ وتىرعان «تىراۋلاپ ۇشقان تىرنالار» اتتى ليريكالىق دراما جەڭىستەن كەيىنگى سوۆەت سولداتتارىنىڭ ومىرىنەن سىر شەرتەدى.
«بيىل بىلەسىزدەر، ۇلكەن توي - ۇلى جەڭىستىڭ 70 جىلدىعى. بۇل مەرەيتوي جىل باسىنان باستاپ، ارداگەرلەرگە دەگەن قۇتتىقتاۋلاردان باستالدى. ەلىمىزدىڭ تۇكپىر- تۇكپىرىندە ءار ءتۇرلى ءىس- شارالار وتكىزىلىپ جاتىر. سونىڭ ىشىندە ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاتردىڭ ساحناسىنداعى «تىراۋلاپ ۇشقان تىرنالار» دەگەن رەسەيلىك دراماتۋرگ ۆالەنتين ەجوۆتىڭ شىعارماسى بويىنشا قويىلاتىن سپەكتاكل. قازاق تىلىنە اۋدارعان اشىربەك سىعاي. بۇل قويىلىمدا ەڭ بىرىنشىدەن، ءبىزدىڭ اعالارىمىز بەن اپالارىمىزدىڭ ۇلكەن ەرلىگى كورسەتىلەدى. ودان كەيىن ادامي قاسيەتتەر، ادامي قۇندىلىقتار، ماحاببات، وتانعا دەگەن سۇيىسپەنشىلىك، ەرلىك، وجەتتىك - وسىنىڭ بارلىعى پاش ەتىلەدى»، - دەدى مەملەكەتتىك حاتشى تىلشىلەرگە بەرگەن سۇحباتىندا.
ونىڭ سوزىنشە، 70 جىل وتسە دە، اتا- بابالارىمىزدىڭ جاساعان ەرلىكتەرى مەن كەيىنگى ۇرپاققا سىيلاعان جەڭىسى كىمنىڭ دە بولسىن جادىندا قالا بەرمەك.
«جالپى قازاقستان جەرىنەن 1 ميلليون 800 مىڭنان استام سوعىسقا شاقىرىلعان ازاماتتار بولدى، ولاردىڭ جارتىسى وكىنىشكە وراي، وتان ءۇشىن جەر جاستاندى. قازىر ەلىمىزدە 4700 دەن استام ارداگەرلەر بار، ولارعا بارلىق ماراپاتتار كورسەتىلىپ جاتىر. جىل بويىنا دا كورسەتىلە بەرەدى دەپ ويلايمىن. ال بۇگىنگى مىنا قويىلىم جاستارعا، ءبىزدىڭ بارلىعىمىزعا ۇلگى بولاتىن، پاتريوتتىق سەزىمدى وياتاتىن قويىلىم بولادى دەپ ويلايمىن»، - دەپ ءتۇيدى ءسوزىن گ. ءابدىحالىقوۆا.
سپەكتاكل ورىس دراماتۋرگى ۆالەنتين ەجوۆتىڭ «بۇلبۇلدار ءتۇنى» شىعارماسى جەلىسى بويىنشا ساحانالاندى. قازاق تىلىنە اۋدارعان بەلگىلى تەاتر سىنشىسى، مەملەكەتتىك سىيلىقتىڭ يەگەرى، پروفەسسور - اشىربەك سىعاي. رەجيسسەرلىق نۇسقاسىن قازاقستاننىڭ حالىق ءارتيسى، تەاتر جانە كينو رەجيسسەرى تالعات تەمەنوۆ جاسادى.
اتالمىش قويىلىم باس كەيىپكەر پەرنەبەك بورانبايەۆ پەن نەمىس قىزى ينگانىڭ اراسىنداعى كەزدەيسوقتىقتان تۋىنداعان ماحاببات تاقىرىبىن كوتەرەدى. وسى ارالىقتا ادامزاتقا ورتاق قاسيەت - ماحاببات پەن جاۋىزدىق، ادامگەرشىلىك پەن سىيلاستىق، وشپەندىلىك پەن سۇيىسپەنشىلىك، ساعىنىش پەن مەيىرىمدىلىكتىڭ ۇشقىنىن سپەكتاكل بارىسىنان كورەسىزدەر.
قويىلىمداعى باستى كەيىپكەر پەرنەبەك بورانبايەۆتى وتاندىق كينو ونەرىندە بىرنەشە باستى رولدەردى سومداپ جۇرگەن جاس اكتەر - ءابىلمانسۇر سەرىكوۆ ساحنالاسا، نەمىس قىزى ينگانىڭ رولىندە - تەاتردىڭ جاس اكتريساسى اقمارال تانابايەۆا. سونداي- اق، سپەكتاكل بارىسىنان بۇگىندە كورەرمەننىڭ ىستىق ىقىلاسىنا بولەنىپ جۇرگەن تەاتر ارتيستەرى، قازاقستاننىڭ حالىق ءارتيسى ت. مەيراموۆ، قازاقستاننىڭ ەڭبەك سىڭىرگەن قايراتكەرلەرى - ا. وماروۆ، ن. وتەۋىلوۆ، ق ر «دارىن» جاستار سىيلىعىنىڭ يەگەرى س. قاشقابايەۆ پەن ق. قىستىقبايەۆتار ونەر كورسەتەدى.