وزبەك پرەزيدەنتى رەسمي تۇردە تاعىنا وتىردى

استانا. قازاقپارات - بۇگىن تاشكەنتتە وزبەكستان پرەزيدەنتى يسلام كاريموۆتىڭ سالتاناتتى ۇلىقتاۋ شاراسى ءوتتى.

پارلامەنتتىڭ جوعارعى (سەنات) جانە تومەنگى (زاڭنامالىق) پالاتالارىنىڭ بىرلەسكەن وتىرىسىنا سونىمەن قاتار ورتالىق سايلاۋ كوميسسياسىنىڭ جانە ۇكىمەت مۇشەلەرى، كونستيتۋتسيالىق سوتتىڭ سۋديالارى، تاشكەنتتە اككرەديتتەلگەن ديپلوماتيالىق ۆەدومستۆولاردىڭ باسشىلارى قاتىستى.

وزبەكستان پرەزيدەنتىنىڭ كۋالىگىن ي. كاريموۆكە و س ك ءتوراعاسى ميرزا- ۋلۋگبەك ابدۋسالوموۆ تابىس ەتتى. ودان سوڭ قايتا سايلانعان مەملەكەت باسشىسى ەل كونستيتۋتسياسى مەن قۇرانعا ءبىر مەزەتتە قولىن قويىپ، رەسپۋبليكانىڭ كونستيتۋتسياسى مەن زاڭدارىن قاتاڭ ساقتايتىنىنا، ازاماتتاردىڭ قۇقىعى مەن ەركىندىگىنە كەپىلدىك بەرەتىنىنە انت قابىلدادى، دەپ حابارلادى «ينتەرفاكس».

 وزبەكستاندا پرەزيدەنتتىك سايلاۋ ءتورتىنشى رەت 29 -ناۋرىزدا ءوتتى. وعان ءتورت كانديدات قاتىستى: وزبەكستاننىڭ ليبەرالدى- دەموكراتيالىق پارتياسى ۇسىنعان قازىرگى پرەزيدەنت يسلام كاريموۆ، حاتامجون كەتمونوۆ (وزبەكستاننىڭ حالىقتىق- دەموكراتيالىق پارتياسى، ءو ح د پ)، اكمال سايدوۆ («ميلليي تيكلانيش» («ۇلتتىق قايتا ورلەۋ») ۇلتتىق- دەموكراتيالىق پارتياسى) جانە ناريمون ۋماروۆ («ادولات» («ادىلەت») سوتسياليستىك- دەموكراتيالىق پارتياسى).

قازىرگى پرەزيدەنت يسلام كاريموۆ 90,39 پايىز داۋىس جيىپ جەڭىسكە جەتتى. 2007 -جىلعى پرەزيدەنتتىك سايلاۋدا كاريموۆ ءۇشىن سايلاۋشىلاردىڭ 88,1 پايىزى داۋىس بەرگەن.