ساكەن سەيفۋلليننىڭ بەلگىسىز بولىپ كەلگەن ءانى تابىلدى

استانا. قازاقپارات - قازىرگى قازاق ادەبيەتىنىڭ نەگىزىن قالاۋشىلاردىڭ ءبىرى، اقىن، جازۋشى، قوعام جانە مەملەكەت قايراتكەرى ساكەن سەيفۋلليننىڭ بەلگىسىز بولىپ كەلگەن ءانى تابىلدى، - دەپ حابارلايدى «ك ت ك» تەلەارناسى.

استانانىڭ 85 جاستاعى تۇرعىنى ءماريام سالكەن قىزى بۇل ءاندى اكەسىنەن ەستىگەنىن، ال اكەسى ساكەن سەيفۋلليننىڭ دوسى ەكەنىن ايتىپ بەردى. «ەشكىم ايتپاعان سوڭ، ونى جارىققا شىعارۋ كەرەك. ول ولەڭ ءوزى قالاي شىققان ولەڭ؟ ول ولەڭ ءوزى ايداۋدا جۇرگەندە، تۇرمەدە وتىرعاندا جازعان ولەڭ. ونى جىلاپ وتىرىپ جازدى ما، ەلىن ساعىنعانىنان جازدى ما بىلمەيمىن ەندى»، - دەدى سالكەن قىزى.

سونىمەن قاتار، كەيۋانا وسىعان دەيىن بۇل ءاندى بىلسە دە، كوپ الدىندا شىرقاۋعا قورىققاننان ايتا الماي جۇرگەن. ول بۇل ءاندى تەك توي-تومالاقتا ايتىپ بەرىپ وتىرادى ەكەن. بۇل ءان سەيفۋلليننىڭ ايداۋدا جۇرگەن شاعىندا تۋعان جەرى «سارىارقاعا» ارنالىپتى. كەيۋانا ءاندى بولاشاق ۇرپاققا اماناتتاپ كەتۋدى ويلاعان.