كەلىسىم تۋرالى حابار تاراعان بويدا يران جۇرتشىلىعى كوشەگە شىعىپ، تويلاۋدى باستاپ كەتتى. ولار بىرنەشە جىل ەل ەكونوميكاسىنىڭ دامۋىن تەجەگەن سانكسيالاردىڭ بوسايتىنى تۋرالى حاباردى ەستىپ، ءماز- مەيرام.
شەكتەۋ سالدارىنان يران حالقى تۇتىنۋ تاۋارلارى مەن ءدارى- دارمەكتەن تارىققان. لوزاننادا قابىلدانعان قۇجاتقا سايكەس، تەگەران ۋران ءوندىرۋ قوندىرعىسىن 19 مىڭنان 6 مىڭعا ازايتادى جانە ءوندىرىس جەلىسى ماگاتە ءۇشىن اشىق بولۋى ءتيىس.
سونداي اق الداعى 15 جىل بويىنا يران ۋراندى 3 پايىزدان ارتىق بايىتپاۋعا كەلىسىم بەردى. ەسەسىنە باتىس ەكونوميكالىق سانكسيالاردان بوساتادى. ەلدىڭ سىرتقى ىستەر ءمينيسترى دجاۆاد زاريف تەگەراننىڭ الەمدىك يادرولىق وتىن نارىعىنا شىعاتىنىن مالىمدەدى.
دجاۆاد زاريف، يران سىرتقى ىستەر ءمينيسترى:
ءبىز يننوۆاتسيالىق وندىرىسكە كوشەمىز. الەمدىك نارىققا شىعامىز. بايىتىلعان ۋراندى تابيعي ۋرانعا الماستىرىپ ساتامىز. ءبىز وتكەن تۇندە 9 ساعات بويى بەكەر كەلىسسوز جۇرگىزگەن جوقپىز. قۇجاتتاعى مىندەتتەر تۇگەل ورىندالادى. بۇل ءبىزدىڭ قارىم- قاتىناسىمىزدى وڭالتىپ، الداعى ۋاقىتتا تىعىز جۇمىس ىستەۋگە نەگىز بولادى دەپ سەنەمىن.
«استانا» ارناسى
05:40, 04 ءساۋىر 2015
يراننىڭ يادرولىق باعدارلاماسىنا بايلانىستى تاراپتار تاريحي شەشىمگە قول جەتكىزدى
استانا. قازاقپارات - يراندىقتار مارە- سارە. شۆەيتساريانىڭ لوزاننا قالاسىندا حالىقارالىق ىقپالداستىق «التىلىعى» مەن يران يسلام رەسپۋبليكاسى يادرولىق باعدارلاماعا قاتىستى تاريحي شەشىمگە قول جەتكىزدى. تاراپتار 12 جىلدان بەرگى داۋلى ماسەلەگە اقىرى نۇكتە قويدى.