نۇرلى جول باعدارلاماسى بويىنشا «استانا- الماتى» باعىتىندا جاڭا جول سالىنادى

الماتى. قازاقپارات- «قاز اۆتو جول» ۇلتتىق كومپانياسى» ا ق باسقارما ءتوراعاسىنىڭ ءبىرىنشى ورىنباسارى ۇلان ءالىپوۆ الماتىدا وتكەن عىلىمي- پراكتيكالىق كونفەرەنتسيا بارىسىندا «نۇرلى جول» باعدارلاماسى اياسىندا جۇزەگە اسىرىلىپ جاتقان جوبالار جونىندە اڭگىمەلەدى.

ونىڭ ايتۋىنشا، تەمىرتاۋ، قاراعاندى، بالقاش جانە قاپشاعاي قالالارى ارقىلى وتەتىن «استانا- الماتى» باعىتى بويىنشا جول سالۋ قۇرىلىسى جوسپارلانعان. ونىڭ جالپى ۇزىندىعى 1284 شاقىرىمدى قۇرايدى جانە ءتورت جانە التى جولاقتى بولىپ كەلەدى. قۇرىلىسى اياقتالعان سوڭ جاڭا جول ءبىرىنشى تەحنيكالىق كاتەگورياعا جاتقىزىلاتىن بولادى.

«استانا- وسكەمەن» باعىتى بويىنشا سالىناتىن جول پاۆلودار مەن سەمەي قالالارى ارقىلى وتەتىن بولادى. بۇگىنگى تاڭدا ۇزىندىعى 500 شاقىرىم بولاتىن جولدىڭ 16 ۋچاسكەسىندە جۇمىستار جۇرۋدە. بۇل استانادان پاۆلودارعا جانە پاۆلوداردان سەمەيگە دەيىنگى ارالىق. بيىلعى جىلدىڭ سوڭىنا دەيىن بۇل باعىتتا 102 شاقىرىم جول قولدانىسقا بەرىلەدى دەپ كۇتىلۋدە.

«استانا - پاۆلودار» جانە «پاۆلودار - سەمەي» ۋچاسكەلەرىندە جۇمىستار 2017 - جىلى اياقتالادى. سونىمەن قاتار، ۇستىمىزدەگى جىلى «پاۆلودار - سەمەي» جانە «قالباتاۋ - وسكەمەن» ۋچاسكەلەرىنە قاتىستى جوبالاۋ (جوبالاۋ- سمەتا) قۇجاتتاماسىن ازىرلەۋ جوسپارلانعان. بۇل ۋچاسكەلەر جوسپار بويىنشا 2019 - جىلى قولدانىسقا بەرىلەدى.

سونىمەن قاتار «استانا - اقتوبە - اتىراۋ - اقتاۋ» باعىتتارى بويىنشا استراحان قالاسىنا شىعاتىن جول سالىنادى. 1928 شاقىرىمدىق جول قايتا سالىنادى. 2014 - جىلى بەينەۋ جانە اقتاۋ قالالارى اراسىندا ۇزىندىعى 200 شاقىرىم بولاتىن جول بولىگى قايتا جوندەۋدەن وتكىزىلدى.

قازىر، جالپى ۇزىندىعى 270 شاقىرىم بولاتىن 6 ۋچاسكەدە جۇمىستار ءجۇرىپ جاتىر. ولاردىڭ ىشىندە ۇزىندىعى 170 شاقىرىم بولاتىن «اقتاۋ- شەتپە» ۋچاسكەسىنىڭ جۇمىسىن حالىقارالىق قارجى ينستيتۋتى قارجىلاندىرۋدا.

 2015 - جىلى «اقتاۋ - بەينەۋ» ۋچاسكەسى بويىنشا 40 شاقىرىمدىق جولدى قولدانىسقا بەرۋ جوسپارلانعان. قالعان 230 شاقىرىمدىق جولدىڭ قۇرىلىسى 2016 اياقتالادى.

ۇ. ءالىپوۆ سونىمەن قاتار، ۇزىندىعى 853 شاقىرىم بولاتىن «الماتى - وسكەمەن» باعىتى تۋرالى دا تىڭ مالىمەتتەر كەلتىردى.

 «قاپشاعاي - تالدىقورعان» باعىتى بويىنشا التى ۋچاسكەدە جۇمىستار ءجۇرىپ جاتىر. 2015 - جىلى 47 شاقىرىمدىق جولدى قولدانىسقا بەرۋ جوسپارلانعان. ال قالعان ۋچاسكەلەر 2016 - جىلى قولدانىسقا بەرىلەدى. الماتى مەن تالدىقورعان قالالارىن جالعايتىن جول تولىعىمەن ءتورت جولاقتى بولادى.

 «بۇدان باسقا، رەسپۋبليكالىق ماڭىزعا يە جولداردى اقىلى ەتۋ جۇمىستارى قولعا الىندى. 2022 - جىلعا قاراي 6982 جولعا اقىلى جۇيە ەنگىزۋ جوسپارلانعان. اقىلى جۇيە ءبىرىنشى تەحنيكالىق كاتەگورياعا جاتاتىن جولدار بويىنشا بارلىق اۆتوترانسپورت تۇرلەرىنە، ال ەكىنشى تەحنيكالىق كاتەگوريا بويىنشا تەك جۇك كولىكتەرىنە عانا ەنگىزىلەدى»، - دەدى ۇ. ءالىپوۆ.

اۆتور: جاپپاربەرگەن ايبوتا