ءماسليحات دەپۋتاتتارى استانانىڭ جاڭا بيۋدجەتىن بەكىتتى
دەپ حابارلادى astana.gov.kz.
سەسسياعا استانا قالاسى اكىمىنىڭ ورىنباسارى اندرەي لۋكين، قالالىق ءماسليحات حاتشىسى سانسىزباي ەسىلوۆ، ەلوردا اۋداندارىنىڭ اكىمدەرى، قالالىق باسقارمالاردىڭ باسشىلارى قاتىستى.
استانا قالاسى ەكونوميكا جانە بيۋدجەتتى جوسپارلاۋ باسقارماسىنىڭ باسشىسى جانات نۇرپەيىسوۆتىڭ حابارلاۋىنشا، استانانىڭ 2015 -جىلعى ناقتىلانعان بيۋدجەتىنىڭ كولەمى 349,861 ميلليارد تەڭگەنى قۇرايدى. جەكە تابىستار بويىنشا تۇسكەن قارجى 169,194 ميلليارد تەڭگە، رەسپۋبليكا بيۋدجەتىنەن ترانسفەرتتەر 168,882 ميلليارد تەڭگەنى قۇرايدى.
قوسىمشا قارجى الەۋمەتتىك جانە ينفراقۇرىلىمدىق جوبالاردى ىسكە اسىرۋعا جۇمسالاتىن بولادى. ەلوردا جولدارى مەن كوشەلەرى قايتا جوندەلىپ، سالىنادى، ينجەنەرلىك جەلىلەر تارتىلادى، ايالداما بەكەتتەرى قالپىنا كەلتىرىلەدى، جەدەل جاردەم بريگادالارى ءۇشىن جاڭا ماشينالار ساتىپ الىنادى، قالالىق مەكتەپتەردىڭ جاپسارجايلارىن جوبالاۋ جانە جاڭا بالاباقشالار سالۋ جۇمىستارى جالعاسادى.
استانا اكىمىنىڭ ورىنباسارى ا. لۋكين اتاپ وتكەندەي، «نۇرلى جول» باعدارلاماسىنىڭ اياسىندا، بيۋدجەتتەن بولىنگەن قارجى ءبىرىنشى كەزەكتە ەلوردادا جىلۋ ماگيسترالدارى مەن مەكتەپتەر سالۋعا جۇمسالادى. قالا اكىمدىگى تۇراقتى تۇردە بيۋدجەت قارجىسىن يگەرۋدى قاداعالاپ وتىرادى، بيۋدجەتتىك باعدارلامالار اكىمشىلەرىمەن بىرلەسكەن جۇمىستار جۇرگىزىلەدى، دەبيتورلىق جانە كرەديتورلىق قارىزداردىڭ وسۋىنە جول بەرمەۋ - تۇراقتى باقىلاۋدا.
ءماسليحات سەسسياسىنىڭ كۇن تارتىبىنە جەڭىستىڭ 70 -جىلدىعىنا وراي كومەك كورسەتۋ ماسەلەسى ەنگىزىلدى. استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ءلاززات ابۋيەۆانىڭ ايتۋىنشا، سوعىس ارداگەرلەرى مەن مۇگەدەكتەرىنە ءبىرجولعى قارجىلاي وتەماقى تولەۋ، ءبىرىڭعاي كيىم فورماسىمەن قامتۋ، جەرلەۋ ورىندارىنا بارۋ جولاقىسىن، سونداي- اق، ساناتوريالىق- كۋرورتتىق ەم الۋ اقىسىن تولەۋ ماسەلەلەرى قاراستىرىلعان.
دەپۋتاتتار جاڭا مەكتەپ پەن بالاباقشا سالۋ ءۇشىن جەر الۋ كەلىسىمشارتتارى جوباسىن، ءبىلىم بەرۋ ماسەلەلەرى، الەۋمەتتىك سالا بويىنشا كەيبىر قالالىق كوميسسيالاردىڭ قۇرامىن وزگەرتۋدى، ۇ ە ۇ بىرلەسە جۇمىس ىستەۋدى ماقۇلدادى.