استانادا «اسسامبلەيا - بەيبىتشىلىك پەن جاقسىلىق سيمۆولى» اتتى كونسەرت ءوتتى - فوتو
08:08, 29 - ناۋرىز 2015
استانا. قازاقپارات - كەشە استاناداعى پوليتەحنيكالىق كوللەدجدە قازاقستان حالقى اسسامبلەياسىنىڭ 20 جىلدىعىنا ارنالعان «اسسامبلەيا - بەيبىتشىلىك پەن جاقسىلىق سيمۆولى» اتتى مەرەكەلىك كونسەرت ءوتتى. بۇل تۋرالى ەلوردا اكىمدىگىنىڭ رەسمي سايتىندا حابارلادى.
شارانى ۇيىمداستىرۋشى - قازاقستان حالقى اسسامبلەياسىنىڭ استانا قالالىق بولىمشەسى، شارانىڭ ماقساتى - اۋەسقوي شىعارماشىلىقتى، قازاقستاندا ءومىر سۇرەتىن ۇلتتاردىڭ سالت-داستۇرلەرىن دامىتۋ.
ءىس-شارا اياسىندا ەلوردالىق ەتنومادەني بىرلەستىكتەردىڭ شىعارماشىلىق ۇجىمدارى ونەر كورسەتتى. استانا قالالىق «پولياكي» قوعامدىق بىرلەستىگىنىڭ «ستوكروتكا» ۆوكالدىق ءانسامبلى، تاجىك مادەني ورتالىعىنىڭ بيشىلەرى، «كولحەتي» گرۋزين قوعامدىق-مادەني ورتالىعىنىڭ «باگراتيوني» ۆوكالدىق ءانسامبلى، «حازار» ازەربايجان ەتنومادەني ورتالىعى وكىلدەرىنىڭ جانە استانا قالالىق كازاكتار وداعىنىڭ ورىنداۋىنداعى اندەر كورەرمەندەردىڭ كوڭىلىنەن شىقتى.
كونسەرت سوڭىندا شىعارماشىلىق بىرلەستىكتەر ستۋدەنتتەردى الداعى مەرەكەلەرمەن قۇتتىقتاپ، ولارعا دەنساۋلىق، باقىت جانە وقۋدا تابىستار تىلەدى.