الماتىنىڭ كوشەسىندە تۇڭعىش رەت «كيىز ءۇي مەرەكەسى» اتاپ وتىلەدى
ۇيىمداستىرۋشىلار - «الماتىنىڭ قولونەر پالاتاسى» قوعامدىق قورى وكىلدەرىنىڭ ايتۋىنشا، بۇل كۇندەرى بەس ۇلكەن جانە ءبىر كىشكەنتاي كيىز ءۇي ورناتىلادى. سودان كەيىن، شەبەر دومبىراشىلاردىڭ قاتىسۋىمەن كۇي تارتۋدان كونسەرتتىك باعدارلاما ۇيىمداستىرىلادى. ال كەلۋشىلەر قازاقتىڭ ءار ءتۇرلى ۇلتتىق ويىندارىنا قاتىسا الادى.
ءبىرىنشى كۇنى فەستيۆالدە كيىز ءۇي قۇرۋ ادىستەرى كورسەتىلەدى. سونداي-اق، كيىز باسۋ، كەستە تىگۋ جانە باسقا دا ۇلتتىق كاسىپتەر بويىنشا قولونەرشىلەردىڭ شەبەرلىك سىنىپتارى ۇيىمداستىرىلادى. وندا كوزگە تۇسكەندەرگە باعالى سىيلىقتار تابىس ەتىلەدى. ەكىنشى كۇنى ورتالىق ازيا ەلدەرىنىڭ قولونەر بۇيىمدارى بويىنشا كورمە بولادى.
اتالمىش مادەني شارا «قازاقتىڭ ءداستۇرلى كۇي ورىنداۋ ونەرى» مەن «قازاق پەن قىرعىز حالىقتارىنىڭ كيىز ءۇي دايىنداۋ جانە قۇرۋ ونەرىنىڭ» يۋنەسكو-نىڭ ادامزاتتىڭ ماتەريالدىق ەمەس مادەني مۇرالارى تىزىمىنە ەنۋ قۇرمەتىنە وراي ۇيىمداستىرىلىپ وتىر.
ايتا كەتەلىك، بۇل اتاۋلار يۋنەسكو- نىڭ اتالمىش تىزىمىنە 2014 -جىلى 26 -قاراشادا ەنگەن بولاتىن.
اۆتور: جاپپاربەرگەن ايبوتا