قازاقستاندا تۇڭعىش رەت قاتەرلى ىسىكتى جوعارى دەڭگەيدە ەمدەيتىن ساۋلەلەندىرۋ قۇرىلعىسى ىسكە قوسىلدى
اشىلۋ راسىمىنە ينستيتۋت ۇجىمىمەن قوسا، ق ر دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى الەكسەي سوي قاتىستى.
ءوز سوزىندە اتالمىش ينستيتۋتتىڭ ديرەكتورى، مەديتسينا عىلىمدارىنىڭ دوكتورى قۋانىش نۇرعازيەۆ قۇنى 1 366 ميلليارد تەڭگەنى قۇرايتىن بۇل جوعارى تەحنولوگيالىق اپپاراتتى ورناتۋ 2012-2016 - جىلدارعا ارنالعان «ونكولوگيالىق كومەكتى دامىتۋ» مەملەكەتتىك باعدارلاماسى اياسىندا جۇزەگە اسىرىلعاندىعىن جەتكىزدى.
«بۇل باعدارلاما كەزىندە ەلباسى نۇرسۇلتان نازاربايەۆتىڭ باستاماسىمەن قولعا الىنعان بولاتىن. باعدارلامانىڭ جالپى بيۋدجەتى - 211 ميلليارد تەڭگە. ول 5 جىلعا شاقتالعان. باعدارلامانى جۇزەگە اسىرۋ ونكولوگيالىق اۋرۋلارعا دۋشار بولعان ناۋقاستارعا مەديتسينالىق كومەك كورسەتۋ ساپاسىن جاڭا دەڭگەيگە كوتەرۋگە مۇمكىندىك بەرەدى. ءبىز ينستيتۋت جانىنان جاڭا بىرەگەي عيمارات سالدىق. وعان 1,5 جىل ۋاقىت كەتتى. ءسويتىپ، بۇل كەشەننىڭ ىشىنە جوعارى ەنەرگەتيكالىق جۇيەلىك ۇدەتكىش ورناتىلدى. ونىمەن جۇمىس ىستەيتىن كادرلار دايارلادىق. بۇل اپپارات ەندى ساۋلەلى تەراپيانى وتە جوعارى دەڭگەيدە جۇرگىزۋگە مۇمكىندىك بەرەدى»، - دەدى ق. نۇرعازيەۆ.
ءوز كەزەگىندە ق ر دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى الەكسەي سوي بولاشاقتا استانا، اقتوبە جانە سەمەي قالالارىندا دا وسىنداي قۇرىلعى ىسكە قوسىلاتىندىعىن جەتكىزدى.
«قازىر بۇكىل رەسپۋبليكا بويىنشا ونكولوگيالىق ديسپانسەرلەر زامانۋي كومپيۋتەرلەرمەن، توموگرافيالارمەن، رەنگەندىك، ەندوسكوپيالىق جانە باسقا دا تەحنولوگيالارمەن جابدىقتالۋدا. ونكولوگيالىق قىزمەتتەردىڭ 100 اسا قىزمەتكەرلەرى شەت ەلدەردە بىلىكتىلىگىن ارتتىرىپ كەلدى. ەلىمىزدە قاتەرلى ىسىك اۋرۋلارىن الدىن الۋ ماقساتىندا 6 سكرينينگتىك باعدارلاما جۇزەگە اسىرىلادى. ولار جىلىنا 2 ميلليون ادامدى قامتيدى.
سونىمەن قاتار، استانا، اقتوبە، قاراعاندى، سەمەي جانە الماتىدا ونكولوگيالىق ديسپانسەرلەر بازاسىندا 5 جوعارى تەحنولوگيالىق ورتالىقتار اشىلدى. ەندى بولاشاقتا استانا، اقتوبە جانە سەمەي قالالارىندا اتالعان ۇدەتكىشتەر دە ورناتىلاتىن بولادى»، - دەدى ا. تسوي.
بۇدان كەيىن، قۋانىش نۇرعازيەۆ پەن الەكسەي تسوي سالتاناتتى جاعدايدا لەنتا قيىپ، جاڭا كەشەننىڭ تۇساۋىن كەستى.
ايتا كەتەلىك، «True Beam» ساۋلەلەندىرۋ قۇرىلعىسى ناۋقاستىڭ وزگە اعزالارىن زاقىمداماي، تەك وبىر ورنالاسقان ايماقتى عانا ساۋلەلەندىرەدى. بۇل اپپاراتتىڭ قوسىمشا قالقاندارى ناۋقاستىڭ وبىرىنا سايكەس ءتۇرلى فورماعا ەنىپ، ىسىك وشاعىنا ساۋلەنىڭ ەڭ كوپ مولشەرىن جىبەرەدى. وزگە ساۋ اعزالار مۇلدەم زاقىمدانبايدى.
قوسىمشا اۋىرسىنۋ سياقتى ەمنىڭ زياندى اسەرلەرى بولمايدى. ناۋقاستىڭ قاتەرلى ىسىگىنىڭ كولەمى كۇن سايىن قاداعالانىپ، سوعان سايكەس ساۋلەنىڭ باعىتى دا وزگەرىپ وتىرادى. وسىلايشا از ۋاقىتتىڭ ىشىندە ناتيجەلى ەمگە قول جەتكىزۋگە بولادى. ەڭ قيىن نۇكتەلەردە ورنالاسقان ىسىكتەردى ساۋلەلەندىرۋگە وسى اپپاراتتىڭ كومپيۋتەرلىك توموگرافى قولدانىلادى. ءتىپتى ناۋقاستىڭ دەمى ارقىلى ىسىكتى ەمدەۋ ءادىسى دە ءتيىمدى تۇردە پايداعا اسىرىلادى.
ورتالىق ازيا ەلدەرى ىشىندە تۇڭعىش رەت ساتىپ الىنعان بۇل قۇرىلعى الداعى ءساۋىر ايىنان باستاپ، تولىعىمەن قولدانىسقا بەرىلەدى. وندا كۇنىنە 60 ناۋقاسقا ەم جاسالادى دەپ كۇتىلۋدە.
اۆتور: جاپپاربەرگەن ايبوتا