زاماناۋي كيىز ءۇي
ۋىق، كەرەگە، شاڭىراقتىڭ ءبارى ادەتتەگىدەي اعاشتان ەمەس، تەمىردەن.
اينالدىرعان 20 مينۋتتىڭ ىشىندە ەپتى ادام جيناپ، قايتا قۇرا الاتىن كيىز ءۇي سۇرانىسقا وراي التى، ون ەكى قاناتتى بولىپ جاسالادى.
ساتىپ الۋشىلار قاتارى كوبەيسە، تەمىردەن ءتۇيىن تۇيگەن كومپانيا جۇمىسشىلارى ءتۇرلى ۇلتتىق بۇيىمدار جاساۋدى قولعا الماق.
جازدا ءىشى سالقىن، قىستا جىلى، جينالمالى، قۇراستىرمالى اعاش ءۇي قاشاندا ىڭعايلى ءارى ۇلتتىق ءداستۇرىمىزدى ايشىقتاپ تۇرادى. ناۋرىز مەرەكەسىندە عانا قۇرىلىپ، بىلايعى ۋاقىتتا شاڭ باسىپ، قويمالاردا جاتاتىن اعاش ءۇي قازىر كوپشىلىكتىڭ قىزىعۋشىلىعىن قايتا وياتتى.
بىرەۋلەر اعاش ءۇي ءتارىزدى ءۇي سالدى، مەيرامحانا تۇرعىزدى، مۋزىكا تىڭداۋعا ارنالعان تەحنيكا قۇراستىردى.
مۇنىڭ ءبارى ۇلتتىق مادەنيەتىمىزدەن ءتىنىمىزدىڭ اجىراماعانىن بىلدىرەدى. ال اقتوبەلىك «كاسپي+» ج ش س- نىڭ جۇمىسشىلارى ەكى اپتادا كوپشىلىكتىڭ كوزى قىزىعاتىن كيىز ءۇي قۇراستىردى.
«قازاقتىڭ كيىز ءۇيىن جاڭا فورماتتا جاساپ شىعارىپ، كولەمىن العاشقىدا التى قاناتتى ەتتىك. مەتال شىعاراتىن زاۋىت بولعاندىقتان، گەرمانيادان اكەلىنگەن 3D ستانوگىن ءساتتى پايدالانعان جايىمىز بار. ءبىز جاساپ شىعارعان اعاش ءۇيدى 20 مينۋتتا قۇراستىرىپ، جيناپ الۋعا بولادى» دەيدى كومپانيا ينجەنەرى بولات پانگەرەيەۆ.
بولاتتان جاسالعان بۇل كيىز ءۇي رەسپۋبليكالىق جانە حالىقارالىق كورمەلەرگە دە شىعىپ ءجۇر ەكەن. كاسىپكەر نەمىس كومپانياسىنىڭ سەرتيفيكاتىن دا العان. شاحتالىق اركالاردى جاساپ شىعاراتىن كومپانيا «الداعى ۋاقىتتا سۇرانىس تۇسسە، ءتۇرلى ۇلتتىق بۇيىمدار جاساۋعا ءازىرمىز» دەپ وتىر.
التىناي ساعىندىقوۆا، اقتوبە وبلىسى
«ايقىن»