بەلگىلى ۇستاز ءسابينا التىنبەكوۆانىڭ سۇلۋلىعىنا كۇمان كەلتىردى
ءبىلىم جانە عىلىم مينيسترلىگى قۇرمەت گراموتاسىنىڭ يەگەرى، بەلگىلى ۇستاز توعايباي نۇرمۇرات ۇلى Abai.kz-تەگى ماقالاسىندا بۇل جايتقا ءبىراز اشۋلى ەكەندىگىن بايقاتقان.
«ءبىزدىڭ ءسابينا قىزىمىزدى قىتايلىقتار نەگە ماقتادى دەيسىز. قازاقتا ءسابينادان وتكەن كەرەمەت سۇلۋلار دا جەتەرلىك. بۇل جەردە ءسابينانىڭ سۇلۋلىعى اڭگىمە ەمەس، قىتاي مەملەكەتىنىڭ قىرىق ميلليون ەركەككە قازاقتان ايەل تاۋىپ بەرۋ ساياساتى بۇركەمەلەنىپ جاتىر. سوندىقتان، ولار ءسابينانى قازاق قىزىنىڭ ايناسى ەتىپ كورسەتىپ وتىر»، - دەيدى ۇستاز.
ونىڭ ويىنشا، ميلليونداعان قازاق قىزدارى بۇل ساياساتتىڭ قۇربانى بولۋدا.
«شەتەلدىكتەردىڭ «قازاق قىزدارى سۇلۋ، ادەمى» دەپ وتىرىك ماقتاعانىنا تۇسىنىگىمىز جەتپەگەنىنە قاپالىمىن. قاي اتا-بابامىز ءوز قىزدارىن شەتەلدىكتەرگە كورسەتىپ ماقتانعان ەدى؟ ولار تاۋار ما ەدى، مال ما ەدى؟ قازاقستاننىڭ «برەندى» ەندى قازاق قىزدارى بولعانى ما؟»، - دەيدى وقىتۋشى.
ۇستازدىڭ پايىمداۋىنشا، قازاق قىزدارىنىڭ ءبىرازى وسىنداي اسپانعا كوتەرۋشىلىكتىڭ كەسىرىنەن قازاق جىگىتتەرىن مەنسىنبەي، وزگە ۇلتقا تۇرمىسقا شىعۋدا.
«ماسقارانىڭ باسى ەمەس پە؟ اللا پۋگاچيەۆانىڭ نەمەرەسىنە كۇيەۋگە شىعادى دەگەن قازاق قىزىنىڭ جايى نە بولدى؟ ۇلتاراق سەكىلدى تابانىنا باسىپ ءجۇردى دە، جىلۋى كەتكەسىن لاقتىرىپ تاستادى» - دەپ وقىتۋشى بۇل جايتتى دا سىنعا الدى.
نۇرمۇرات ۇلىنىڭ ويىنشا، ارۋلارىمىزعا ايتىلعان بۇل ماقتاۋ شىن جۇرەكتەن شىققان ءسوز ەمەس، قۇيتىرقى ساياسات ەكەن.