نيۋ-يوركتە قازاقستاننىڭ قاتىسۋىمەن سالىنعان قۇلدىق قۇرباندارىنا ارنالعان «قايتۋ كەمەسى» ەسكەرتكىشى اشىلدى
اشىلۋ ءراسىمى 25- ناۋرىزدا قۇلدىق پەن ترانساتلانتتىق قۇل ساۋداسىنىڭ قۇرباندارىن ەسكە الۋ حالىقارالىق كۇنىنە وراي ۇيىمداستىرىلدى.
قازاقستان افريكا، لاتىن امەريكاسى جانە كاريب ەلدەرىمەن نيەتتەس ەكەنىن ءبىلدىرىپ، تۇراقتى ەسكەرتكىشتىڭ قۇرىلۋىن قارجىلاندىرۋعا ءوز ۇلەسىن قوستى، دەپ حابارلادى ق ر س ءى م باسپا ءسوز قىزمەتى.
ەسكەرتكىشتى قۇراستىرۋ جۇمىستارى بىرنەشە جىل بۇرىن باستالدى. 2009-جىلى ب ۇ ۇ ارنايى حالىقارالىق كوميتەتىن قۇرىپ، ەڭ ۇزدىك جوباعا كونكۋرس جاريالادى. 2013-جىلى كوميتەت 83 مەملەكەتتەن كەلىپ تۇسكەن 310 جوبالار اراسىنان گايتيدەن شىققان امەريكاندىق ساۋلەتشى رودني لەوننىڭ جۇمىسىن تاڭدادى.
تاريحتا ورىن العان ەڭ اۋقىمدى ءماجبۇرلى ميگراتسيانىڭ قۇرباندارى - 15 ميلليونعا جۋىق ەرلەر، ايەلدەر مەن بالالاردى ەسكە الۋ ءۇشىن حالىقارالىق قاۋىمداستىق سوڭعى جەتى جىل بويى 25- ناۋرىزدى قۇلدىق جانە ترانساتلانتتىق قۇل ساۋداسىنىڭ قۇرباندارىن ەسكە الۋ حالىقارالىق كۇنى رەتىندە اتاپ وتەدى.
حالىقارالىق كۇننىڭ بيىلعى باستى تاقىرىبى - «ايەلدەر جانە قۇلدىق» بولىپ بەكىتىلگەن. بۇل كۇنى ب ۇ ۇ قابىرعاسىندا اۋىر قيىندىقتارعا قاراماستان افريكا مادەنيەتىن ساقتاپ، كەلەسى ۇرپاققا جەتكىزگەن ايەلدەردىڭ كۇش-جىگەرى مەن باتىلدىعى ەسكە الىندى. ب ۇ ۇ باس حاتشىسى پان گي مۋن ءوز جولداۋىندا قۇل بولعان ايەلدەر جانۇيالارىنىڭ جانە قاۋىمدارىنىڭ ابىرويىن قورعاۋعا باستى سەپتىگىن تيگىزگەنىن اتاپ ءوتتى.
«قايتۋ كەمەسى» ەسكەرتكىشىنىڭ اۆتورى رودني لەون ءوزىنىڭ شىعارماشىلىق ەڭبەگىندە قۇلدار مەن قۇل يەلەنۋشىلىككە قارسى كۇرەسكەرلەردىڭ باتىرلىعىن ماداقتاپ بەينەلەدى. ەسكەرتكىش ترانساتلانتتىق قۇل ساۋداسىنىڭ 400 جىلدىق تاريحىن جانە ساۋدا قۇرباندارى ۇرپاقتارىنىڭ ءالى كۇنگە دەيىن كورگەن زارداپتارىن كورەرمەندەردىڭ ەسىنە سالادى.
حالىقارالىق كۇنگە وراي بىرىككەن ۇلتتار ۇيىمىنىڭ شتاب-پاتەرىندە باس اسسامبلەيانىڭ ارنايى مەرەيتويلىق وتىرىسى وتكىزىلىپ، قازاقستان رەسپۋبليكاسىنىڭ تۇراقتى وكىلى قايرات ءابدىراحمانوۆ سويلەگەن سوزىندە قازاقستاننىڭ ناسىلدىك، ەتنوستىق، ۇلتتىق جانە باسقا كەمسىتۋشىلىككە كەز كەلگەن تۇردە جول بەرمەۋ كاعيداتتارىن تولىقتاي قولدايتىنىن قۋاتتادى.