كۇماندى سالىق تولەۋشىلەردى ايقىندايتىن ساراپتامالىق تاسىلدەر ەنگىزۋ كوزدەلەدى - قارجى مينيسترلىگى

استانا. قازاقپارات - قارجى مينيسترلىگىنىڭ مەملەكەتتىك كىرىس كوميتەتى تاۋەكەلدەردى باسقارۋ جۇيەسىندە كۇماندى سالىق تولەۋشىلەردى ايقىنداۋ ءۇشىن ساراپتامالىق تاسىلدەردى ەنگىزۋدى جوسپارلايدى. بۇل تۋرالى بۇگىن مەملەكەتتىك ورگانداردىڭ سالىقتىق تەكسەرۋلەر تارتىبىنە ارنالعان دوڭگەلەك ۇستەل جيىنى بارىسىندا قارجى مينيسترلىگى مەملەكەتتىك كىرىس كوميتەتىنىڭ وكىلى ەلدار ماملين ايتتى.

دوڭلەگەك ۇستەل جيىنىنا ءىرى سىرتقى ەكونوميكالىق قىزمەتكە قاتىسۋشىلار مەن سالىق تولەۋشىلەر قاتىسقان بولاتىن.

«اعىمداعى جىلى ءبىز تاۋەكەلدەردى باسقارۋ جۇيەسىن بەلسەندى تۇردە دامىتۋدى جالعاستىراتىن بولامىز، تاۋەكەلدەردى قامتۋ اۋماعى كەڭەيەدى، وعان قاتىستى سالىق تولەۋشىلەر ساناتى دا تۇرلەنەدى. بۇدان بولەك، قازىرگى تاڭدا تاۋەكەلدەردى باسقارۋ جۇيەسىنىڭ اناليتيكالىق-تالداۋ باعىتىن دامىتۋ بويىنشا جۇمىستار اتقارىلۋدا. مۇنداي ساراپتامالىق ءتاسىلدى ەنگىزۋدەگى ماقسات - كۇردەلى ماتەماتيكالىق جانە لوگيكالىق اپپاراتتى، الگوريتمدەردى پايدالانا وتىرىپ، سالىق تولەۋشىلەردىڭ زاڭدىلىقتى جاسىرۋىن، كۇماندى ارەكەتتەرى مەن الەۋمەتتىك بايلانىستارىن ايقىنداۋ بولىپ تابىلادى»، - دەيدى ە. ماملين.

ونىڭ ايتۋىنشا، جاڭا ءتاسىل اياسىندا كەدەن جانە سالىق ورگاندارىندا جينالاتىن مالىمەتتەر ستاتيستيكالىق زەرتتەۋلەردى كەڭىرەك قامتيتىن ارنايى باعدارلامالار ارقىلى ساراپتامادان وتەدى. سول بويىنشا كۇماندى سالىق تولەۋشىلەر ايقىندالاتىن بولادى.

اۆتور: قانات مامەتقازى ۇلى