شاڭىراق پىشىندەس زاماناۋي شامدار جوعارى سۇرانىسقا يە

استانا. قازاقپارات - شاڭىراق ۇلگىسىندەگى زاماناۋي شامدار مەن قازاقى ۇستەلدىڭ جاڭا ۇلگىسى. ەلوردالىق عيزات اقپانبەك ۇلتتىق ناقىشتاعى بىرەگەي زاتتار جاساۋمەن اينالىسادى.

شەبەردىڭ ءار تۋىندىسى قازاقيلىعىمەن ەرەكشەلەنەدى. سودان بولار ونىڭ قولىنان شىققان بۇيىمدار جوعارى سۇرانىسقا يە.

وتباسىنداعى بىرلىك، بەرەكە، شاتتىق پەن مول قۋانىش. مۇنىڭ بارلىعى قازاقتىڭ قارا شاڭىراعىنا ءتان ۇعىمدار. دەسە دە، زامان وزگەرگەنى بولار، بۇگىندە مەرەكە نەمەسە توي- تومالاق كەزىندە بولماسا كيىز ءۇيدى كورۋىمىز نەكەن- ساياق.

ۇلتتىق مادەنيەتتى جاڭعىرتۋدى كوزدەگەن عيزات اقپانبەك شاڭىراق ۇلگىسىندەگى زامانۋي شامدار جاساۋدى بۇدان 9 جىل بۇرىن باستاپتى.

عيزات اقپانبەك، شەبەر:

- بىرەۋلەر تەك قانا تازا اعاشتان جاساپ بەر دەپ تاپسىرىس بەرەدى. وعان تازا اعاشتان جاساپ بەرەمىز. بىرەۋلەر اعاش سياقتى، ءبىراق جەڭىل بولسىن دەيدى. وعان پلاستيك كەرەك. مىسالى، بىرەۋىنە 1,5 مەترلىك كەرەك. وعان اعاش تا، پلاستيك تە شىداي قويمايدى، وعان تەمىردەن جاساپ بەرەمىز. ماتەريالدىڭ باعاسى اسا قىمبات ەمەس تە شىعار. ءبىراق شاڭىراق دەگەن نىشان عوي.

جاس شەبەردىڭ نەگىزگى ماماندىعى -  ينجەنەر. ءوزىنىڭ باستى جۇمىسىنان قولى قالت ەتسە بولدى شەبەرحاناعا اسىعىپ، سۇيىكتى ىسىمەن اينالىسادى.

بۇگىندە 200 گە تارتا شام جاساپتى. بىرەگەي تۋىندىنى وسىدان ءبىر جىل بۇرىن ساتىپ العان رايحان زەينۋلينا تاعى دا بىرنەشەۋىنە تاپسىرىس بەرگىسى بار.

رايحان زەينۋلينا، قالا تۇرعىنى:

- بۇل شامدى كورگەن ءاربىر ادام تامسانىپ، قىزىعىپ تۇرادى. ءتىپتى، كوپتەگەن جاستار سۋرەتكە تۇسەدى. اسىرەسە جاڭادان وتباسىن قۇرىپ، ومىرگە قول ۇستاسىپ بىرگە اتتانعان جاستار اۆتور تۋرالى سۇراستىرىپ، ساتىپ الىپ جاتادى.

ەندى شەبەر ەلدەن ەرەك ەتىپ، قازاقى ۇستەل جاساۋدى قولعا الدى. بۇيىم بەتىنە ۇلتتىق ناقىشتاعى ويۋ- ورنەكتەر سالىنىپ، كوز تارتار سۋرەتپەن بەزەندىرىلەدى. ول ەلىمىزدىڭ كارتاسى نەمەسە ارعىماق بولۋى مۇمكىن دەپ وتىر اۆتور.

عيزات اقپانبەك، شەبەر:

- قازاقتىڭ داستارقانىنىڭ قازىرگى زامان تالابىنا ساي قالاي كورىنەتىنى تۋرالى ويلانىپ، ءبىزدىڭ ويلاپ تاپقانىمىز دەۋگە بولماس دەپ شەشتىك. تولىق اشىلعان بەتىندە ءبىزدىڭ ۇستەل وسىنداي. كەلىسسوزدەر جۇرگىزىپ وتىرعان كەزدە تاماقتارىن الىپ كەلسە، وسى جەرگە قويا الادى. ىسكەرلىك قاعازدار ورنىندا بولادى. جەڭىل اينالۋمەن قايتادان ءوز قالپىنا كەلەدى.

عيزات اقپانبەكتىڭ تاعى ءبىر تۋىندىسى -  «بايتەرەك» شامشىراعى. ولاردى كوبىنە سىيلىق رەتىندە الاتىندار كوپ ەكەن. اۆتور ءاربىر تاپسىرىس بەرۋشىگە ەرەكشە ىقىلاسپەن قارايدى. سەبەبى كەز كەلگەن بۇيىم ۇلتتىق مادەنيەتىمىزدى ۇلىقتاۋعا سەپتىگىن تيگىزبەك.

www.24.kz