الماتى جۇرتشىلىعى رەسپۋبليكالىق گازەتتىڭ باس ديرەكتورىن اقتىق ساپارعا شىعارىپ سالدى

الماتى. قازاقپارات - بۇگىن الماتى جۇرتشىلىعى «ەكسپرەسس-ك» رەسپۋبليكالىق قوعامدىق- ساياسي گازەتىنىڭ باس ديرەكتورى الەكسەي پاندى اقتىق ساپارعا شىعارىپ سالدى.

«الەكسەي ۆلاديميروۆيچ تەك قانا تاماشا جەتەكشى عانا ەمەس، سونىمەن قاتار باۋىرمال، مەيىرىمدى جان بولاتىن. ونىڭ جاساعان جاقسىلىقتارى ۇشان- تەڭىز»، - دەدى گازەت قىزمەتكەرلەرى.

ولار باس ديرەكتوردىڭ ارقاسىندا رەداكسيادا ەركىن شىعارماشىلىق احۋال ورناعانىن باسا ايتتى.

«مەن الەكسەيدى جاقسى بىلەتىنمىن. ول كەزىندە «كاراۆان» گازەتىندە جۇمىس ىستەدى. سول كەزدەن باستاپ دوستاسىپ كەتتىك. ەندى، ونىڭ اسىل بەينەسى جادىمىزدا ماڭگىلىك ساقتالادى. ءبىز بولاشاقتا الەكسەي پان اتىنداعى جۇلدە قۇراتىن بولامىز»، - دەدى ق ر جۋرناليستەر وداعىنىڭ ءتوراعاسى سەيىتقازى ماتايەۆ.

بۇعان دەيىن ءمالىم بولعانىنداي، الەكسەي پان 21 - ناۋرىزدا ءۇندىستاننىڭ گوا شيپاجايىندا قايعىلى قازاعا ۇشىرادى. ول گواعا جانۇياسىمەن دەمالۋعا بارعان بولاتىن. جۇبايىنىڭ ايتۋىنشا، جاعاعا كەلىپ سوعىلعان ۇلكەن تولقىننىڭ سالدارىنان بىرنەشە جەرگىلىكتى بالا سۋعا كەتەدى. الەكسەي ولاردى قۇتقارۋعا ۇمتىلادى. بارلىعىن قۇتقارادى. ءبىراق قاتتى زورىققاندىعى جۇرەگىنىڭ توقتاۋىنا اكەپ سوعادى.

الەكسەي پان 57 جاستا بولاتىن. ول ءال-فارابي اتىنداعى قازاق مەملەكەتىتك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. كەزىندە «وگني الاتاۋ»، «كاراۆان» گازەتتەرىندە ەڭبەك ەتتى. 2008 - جىلدان «ەكسپرەسس- ك» گازەتىنىڭ باس ديرەكتورى قىزمەتىن اتقارىپ كەلدى. قازاقستاننىڭ قۇرمەتتى جۋرناليسى بولاتىن.

اۆتور: جاپپاربەرگەن ايبوتا