ەۋروپالىقتاردىڭ قابىرعاسىن قايىستىرعان قازا

استانا. قازاقپارات - كەشەدەن بەرى ديۋسسەلدورفتىڭ اقپاراتتىق جەلىلەرىندە تىنىم جوق. اۋە اپاتىنا ۇشىراعان جولاۋشىلاردىڭ تۋعان-تۋىستارى مەن قايعىدان قابىرعاسى قايىسقان قاراپايىم حالىق تا جولاۋشىلاردىڭ ءولى-ءتىرىسىن سۇراپ، ءجيى قوڭىراۋ شالۋدا.

قازىر كۇللى ەۋروپا ەلدەرى قان جۇتىپ وتىر. دىتتەگەن جەرىنە جەتە الماي، كوز جۇمعانداردىڭ ءتىزىمى ازىرگە تولىق جاريالانعان جوق. ءبىر انىعى، اۋە كەمەسىنىڭ بورتىندا گەرمانيا، يسپانيا، تۇركيا ازاماتتارى بولعان. بۇل گەرمانيا حالقىنىڭ قابىرعاسىن قايستىرعان قارالى سەيسەنبى بولدى. كۇللى ەۋروپا قارا جامىلدى.

قولدا بار اقپارات بويىنشا، ۇشاق بورتىندا 67 گەرمانيا ازاماتى بولىپتى. ونىڭ 16 سى مەكتەپ وقۋشىلارى. ولار تاجىريبە الماسۋ كۋرستارىنان ۇيلەرىنە قايتىپ كەلە جاتقان بولاتىن. جەتە المادى. ءتۇنى بويى مەكتەپ ۇجىمى، وقۋشىلار قىرشىن بولعان سىنىپتاستارىن ەسكە الدى.

اندرەاس كەتەر، حالسترەن قالاسىنىڭ تۇرعىنى: - بالالارىن جوعالتقان بارلىق اتا-انالارعا شىن جۇرەكتەن كوڭىل ايتامىز. بۇل ءبىز ءۇشىن ورنى تولماس قايعى بولدى. ءبىزدىڭ قالامىز ۇلكەن ەمەس. بارلىعىمىز ءبىر-ءبىرىمىزدى جاقسى تانيمىز. قازا بولعان بالالار دا كوز الدىمىزدا وسكەن ەدى.

قارالى رەيستە قازاقستاندا تۋىلعان نەمىس وپەراسىنىڭ ءارتىسى ولەگ برىجاكتا بولعان ەدى. 45 يسپانيا ازاماتى دا اۋە اپاتىندا اجال قۇشتى. يسپانيالىق ب ا ق بورتتا بولعان ءبىر جولاۋشى سەزگەندەي جۇكتى ايەلىن بارسەلونادا قالدىرىپ كەتكەنىن جارىسا جازۋدا.

ماتياس دورنفەلدت، ساياساتتانۋشى: - بۇل -  ۇلكەن قازا. تەرگەۋ جۇرگىزىلىپ اۋە اپاتىنىڭ سەبەبى انىقتالۋ ءتيىس. مەن ءوز باسىم نەمىس اۋە كومپانيالارىنا سەنىممەن قاراپ، قىزمەتتەرىنە ءجيى جۇگىنەتىن ەدىم. سوڭعى ۋاقىتتا جيىلەپ كەتكەن قايعىلى وقيعالاردان كەيىن جاقىندارىم ءۇشىن الاڭدايتىن بولدىم. بۇل اپاتتى زەرتتەۋمەن گەرمانيا، فرانسيا جانە يسپانيا ەلدەرىنىڭ ەڭ تاجىريبەلى ساراپشىلارى اينالىساتىن بولادى.

الپى تاۋىنىڭ شىڭىندا نە بولعانىن ءتۇسىنۋ ءۇشىن حالىقارالىق اۆياتسيا كوميتەتى مەن وپات بولعان ۇشاقتى قۇراستىرۋشى Airbus كومپانياسى ءوز كومەكتەرىن ۇسىنىپ وتىر. گەرمانيا كانتسلەرى انگەلا مەركەل ءوزىنىڭ رەسمي مالىمدەمەسىندە اپاتقا قاتىستى ءار نۇسقا بۇگە-شۇگەسىنە دەيىن تەكسەرىلەتىنىن جەتكىزدى.

انگەلا مەركەل، گەرمانيا كانتسلەرى: - Airbus A320 ۇشاعىنىڭ اپاتى 150 ادامنىڭ ءومىرىن جالماپ، ءبىزدى قاتتى كۇيزەلتتى. ءبىز مارقۇمداردىڭ جاقىندارىن قولداۋ ءۇشىن بارلىق جاعدايدى جاسايتىن بولامىز. ءبىراق ەڭ اۋەلى ءبىز وسى جانتۇرشىگەرلىك جاعدايعا نە تۇرتكى بولعانىن انىقتاۋىمىز ءتيىس. انگەلا مەركەل وپات بولعان جەرگە ارنايى بارىپ، قۇتقارۋشىلاردىڭ جۇمىستارىمەن تانىسپاق. ال جولعا جينالعان گەرمانيانىڭ ءبىرقاتار ازاماتى بۇگىن دىتتەگەن جەرىنە جەتە الماي قالۋى ىقتيمال. سەبەبى Germanwings ۇشقىشتارى Airbus A320 اۋە كەمەسىمەن قانداي دا ءبىر باعىتقا ۇشۋدان باس تارتۋدا.

اۆتورلارى: مانشۇك ماقسۇت قىزى، شولپان نايمانبايەۆا، ميلوسلاۆ لاۆرينوۆسكي

www.24.kz