الەمدەگى ەڭ قىمبات فۋتبولشى گارەت بەيلگە ءوز جانكۇيەرلەرى شابۋىل جاسادى - كەسكىن

استانا. قازاقپارات - «رەال» (مادريد) فۋتبول كومانداسىنىڭ جارتىلاي قورعاۋشىسى، ازىرگە الەمدەگى ەڭ قىمبات فۋتبولشى گارەت بەيلدىڭ كولىگىنە ءوز جانكۇيەرلەرى شابۋىل جاسادى. وقيعا جەكسەنبى كۇنگى «ەل كلاسسيكودان» كەيىن بولعان.

بۇل تۋرالى lenta.ru حابارلادى.

اتالعان ويىندا «رەالدىڭ» «بارسەلوناعا» 1:2 ەسەبىمەن ەسە جىبەرگەنى بەلگىلى.

باستى قارسىلاستارىنان جەڭىلگەنىن كوتەرە الماعان جانكۇيەرلەر شاراسىزدان ءوز فۋتبولشىلارىنا شابۋىل جاسادى.

بەيل ويىننان كەيىن ءوزىنىڭ Bentley ماركالى كولىگىنە وتىرىپ، ستاديوننان شىقپاقشى بولعاندا ءبىر توپ جانكۇيەر وعان لاپ قويادى.

ءتىپتى كولىگىنىڭ الدىنا تۇرىپ، فۋتبولشىنىڭ كەتۋىنە كەدەرگى جاسايدى.

الايدا، ول امالىن تاۋىپ، جونىنە كەتتى. فۋتبولشىنىڭ ەشقانداي ءۇن قاتپاستان كەتىپ قالعانىنا ىزالانعان «كورولدىك» كلۋبتىڭ جانكۇيەرلەرى «رەالدىڭ» كەلەسى ويىنشىسىنا توسقاۋىل بولدى.

بۇل جولى ولار شابۋىلشى حەسەنىڭ جولىن كەس-كەستەدى. سول كەزدە فۋتبولشى كولىگىنىڭ اينەگىن ءتۇسىرىپ، جانكۇيەرلەرمەن تىلدەستى. از-كەم سۇحباتتان كەيىن ونى فۋتبول فاناتتارى جونىنە جىبەردى. ءوز جانكۇيەرلەرىنىڭ بۇل ءىسىن سىنعا العان «رەالدىڭ» ۆيتسە-كاپيتانى سەرحيو راموس: «سىزدەرگە نە بولعان؟ بۇل ىستەرىڭىزدى دۇرىس دەپ سانايسىزدار ما؟»، -  دەپ ولارعا ءىستىڭ ءمان-جايىن تۇسىندىرۋگە تىرىستى.

گارەت بەيل 2013 - جىلدان باستاپ «رەال» ساپىندا وينايدى. ول بۇگىنگە دەيىن اتالعان كوماندا ءۇشىن 52 ماتچ وتكىزىپ، 27 گول سوققان. «كورولدىك كلۋب» فۋتبولشىنى انگليانىڭ «توتتەنحەمىنەن» 100 ميلليون ەۋروعا ساتىپ العان بولاتىن. ازىرگە بۇل كورسەتكىش الەم بويىنشا رەكوردتى سوما رەتىندە تىركەۋلى تۇر.

ەلامان قوڭىر

«ەگەمەن قازاقستان»