وسكەمەندە ۇلىستىڭ ۇلى كۇنى ەرەكشە سيپاتتا تويلاندى - كەسكىن

استانا. قازاقپارات - وبلىستىق «دوستىق ءۇيىنىڭ» شىعارماشىلىق ۇجىمى تاڭ سارىدەن قوعامدىق كولىككە مىنگەن بارشا قالا تۇرعىندارى مەن قوناقتارىن ناۋرىز مەرەكەسىمەن قۇتتىقتادى. جولاۋشىلار باستاپقىدا تاڭ قالعاندارىمەن، كەيىننەن اسەم ءاننىڭ ىرعاعىنا ىلەسىپ بيلەپ، قوسىلا شىرقاپ جاتتى.

تىپتەن، ادامنىڭ كوپتىگىنە قاراماستان، شەشەن ەتنو- مادەني بىرلەستىگىنىڭ مۇشەلەرى ۇلتتىق بيلەرىن بيلەدى. قوعامدىق كولىكتە وتكەن بۇل شارا - «قازاقستان - ءبىزدىڭ ورتاق ءۇيىمىز» اتتى رەسپۋبليكالىق اكسيانىڭ جالعاسى.

سونداي-اق ۇيىمداستىرۋشىلار تاراپىنان قازاقستان تاريحىنا بايلانىستى ۆيكتورينالىق سۇراقتار قويىلدى. ساۋالدارعا دۇرىس جاۋاپ بەرىپ، بەلسەندىلىك تانىتقاندارعا سىي-سياپات ۇلەستىرىلدى.

ايبارشا ءجۇمادىلوۆا، وبلىستىق «دوستىق ءۇيىنىڭ» قىزمەتكەرى:

- تۇرعىنداردىڭ ءبىلىمى وتە جاقسى ەكەن. قويعان سۇراقتارىمىزعا بىردەن جاۋاپ بەرىپ جاتتى. بيىلعى جىل قازاقستان ءۇشىن مەرەيلى جىل. قازاقستان كوپ ۇلتتى مەملەكەت. بۇگىنگى كۇنى، ناۋرىزدى تەك قازاق حالقى تويلاپ وتىرعان جوق، ول حالىقتىق مەرەكەگە اينالۋدا. تەگى بولەك بولعانىمەن، تىلەگى ءبىر، ارمانى ورتاق. بۇگىندە ءبىر تۇتاس قازاقستان حالقىنا اينالىپ وتىر. مۇكاراما شوكەلەكوۆا، وسكەمەن قالاسى تۇرعىنى:

- بۇكىل قازاقستاندىقتاردى ناۋرىز مەرەكەسىمەن قۇتتىقتايمىن! مەرەكەلەرىڭ قۇتتى بولسىن! اسپانىمىز اشىق بولسىن! جاستاردىڭ مىنا باستاماسى جاقسى ەكەن. قۋانىشتىمىن!

www.khabar.kz