عالىمدار سەمىزدىكتىڭ تاعى ءبىر سەبەبىن اتادى

استانا. قازاقپارات - دەنەنىڭ تومەن تەمپەراتۋراسى - سەمىرۋدىڭ ءبىر سەبەبى، دەپ ەسەپتەيدى عالىمدار.

ادام دەنەسىنىڭ قالىپتى ىشكى تەمپەراتۋراسى شامامەن 37 گرادۋستى قۇرايدى. ول قورشاعان ورتا تەمپەراتۋراسى مەن فيزيكالىق بەلسەندىلىك دەڭگەيىنە تاۋەلدى ەمەس.

بولون ۋنيۆەرسيتەتىنىڭ عالىمدارى كەيبىر ادامداردىڭ دەنەسىنىڭ ىشكى تەمپەراتۋراسى نورماعا جەتپەيتىنىن انىقتاعان. وسىنداي ادامنىڭ اعزاسى ەنەرگيانى جەتكىلىكتى تۇردە پايدالانا المايدى. بۇل سالماقتىڭ كوبەيۋى (جىلىنا ەكى كەلىگە دەيىن) مەن سەمىرۋگە اپارىپ سوقتىرادى، دەپ جازادى The Daily Mail.

ميدا تەمپەراتۋرانىڭ رەتتەلۋىنە گيپوتالامۋس جاۋاپ بەرەدى. وندا قاننىڭ تەمپەراتۋراسىنا سەزىمتال تەرمورەتسەپتورلار بار. ءوز كەزەگىندە تەرىنىڭ سىرتىندا ورنالاسقان تەرمورەتسەپتورلار گيپوتالامۋسقا تەرى بەتىنىڭ تەمپەراتۋراسى تۋرالى اقپارات جىبەرىپ وتىرادى.

زەرتتەۋشىلەر سەمىزدىككە دۋشار بولعان ادامداردىڭ دەنە تەمپەراتۋراسى ارتىق سالماعى جوق ادامداردىڭ دەنە تەمپەراتۋراسىمەن سالىستىردى. سەمىز ادامداردىڭ دەنەسىنىڭ ىشكى تەمپەراتۋراسى ەداۋىر تومەن بولعان. ياعني، بۇل سەمىزدىككە بيولوگيالىق بەيىمدىلىكتىڭ بار ەكەنىنە كوز جەتكىزەدى.

 ماماندار ولاردىڭ شىعارعان قورىتىندىلارى سەمىزدىكتى ەمدەۋدىڭ جاڭا ادىستەرىن شىعارۋعا كومەكتەسەتىنىنە ۇمىتتەنەدى.