تالدىقورعاندا ناۋرىز مەرەكەسى كەڭىنەن اتاپ ءوتىلدى - فوتو

استانا. قازاقپارات - تالدىقورعان قالاسىندا ناۋرىز مەرەكەسى كەڭ اۋقىمدا اتالىپ ءوتىلدى، دەپ حابارلايدى وبلىس اكىمدىگىنىڭ باسپا ءسوز قىزمەتىنەن.

كۇن مەن ءتۇن تەڭەلگەن كوكتەمنىڭ جايماشۋاق مەرەكەسىندە قالاداعى ورتالىق الاڭعا قالا تۇرعىندارى مەن قوناقتار جينالىپ، مەرەكەلىك شاراعا قاتىستى ازىرلەنگەن كونسەرتتىك باعدارلامالاردى، تەاترلاندىرىلعان كورىنىستەردى تاماشالادى. كوپشىلىككە تاريحي كەزەڭدەردەگى، اڭىزدارداعى باتىرلار بەينەسى سومدالعان ساحنالىق قويىلىمدار ۇسىنىلدى.

وسىدان كەيىن الماتى وبلىسىنىڭ اكىمى اماندىق باتالوۆ قالا تۇرعىندارىن ناۋرىز مەرەكەسىمەن قۇتتىقتاپ، مەرەكەلىك تىلەگىن جەتكىزدى.

«بارشاڭىزدى ەڭبەك پەن ىرىستىڭ، ىزگىلىك پەن جاقسىلىقتىڭ جارقىن مەرەكەسى - ناۋرىز مەيرامىمەن شىن جۇرەكتەن قۇتتىقتايمىن. ءاز-ناۋرىز ەلىمىزگە باق-بەرەكە، مول تابىس الىپ كەلسىن! جاڭا قوي جىلى تاريحي ماڭىزى زور وقيعالارمەن، ايتۋلى مەرەيتويلارمەن ەرەكشەلەنبەك. ۇلى جەڭىستىڭ 70 جىلدىعىن، قازاقستان حالقى اسسامبلەياسى جىلى مەن كونستيتۋتسيامىزدىڭ 20 جىلدىعىن، قازاق حاندىعىنىڭ 550 جىلدىعىن اتاپ وتەتىن بولامىز. وسىلايشا تاريحتان تاعىلىم الىپ، وتكەنگە تاعزىم ەتىپ، بولاشاققا باعدار جاساپ وتىرمىز. وسىنىڭ ءبارى تاۋەلسىزدىگىمىزدىڭ ارقاسى»، - دەدى ول.

«قۇرمەتتى جەتىسۋلىقتار! ناۋرىز كۇنى ادامدار اق تىلەۋ ايتادى، ادال كوڭىلىن، كەڭ پەيىلىن بىلدىرەدى. ءبىر-بىرىنە باق-بەرەكە، ىنتىماق تىلەيدى. ەندەشە ۇلىستىڭ ۇلى كۇنى قۇتتى بولىپ، كۇننىڭ العاشقى نۇرى ءاربىر شاڭىراققا باقىت، بولاشاققا دەگەن سەنىمدىلىك اكەلسىن! ۇلىس وڭ، اق مول بولسىن اعايىن!» - دەپ قورىتىندىلادى ءسوزىن وبلىس باسشىسى.

شارا وبلىستىق ءسۇيىنباي اتىنداعى فيلارمونيا ارتىستەرىنىڭ ورىنداۋىنداعى مەرەكەلىك كونتەرتكە ۇلاستى.