جامبىل وبلىسىندا باتىر اتىنداعى اۋىلدىڭ تۇرعىندارى باۋىرساق جەۋدەن سايىستى - كەسكىن

استانا. قازاقپارات - جامبىل وبلىسىندا ناۋرىز مەرەكەسى ەرەكشە تويلاندى.

جۋالى اۋدانىنداعى باتىر باۋىرجان مومىش ۇلى اتىنداعى اۋىلدا ءداستۇر بويىنشا ناۋرىزكوجە ءپىسىرىلىپ، كەلگەن قوناقتار اق داستارحاننان ءدام تاتتى.

 ورتالىق الاڭعا كيىز ۇيلەر تىگىلىپ، قازاق حالقىنىڭ سالت-ءداستۇرى مەن ادەت عۇرىپتارى كورسەتىلدى. ەڭ قىزىعى، العاش رەت باۋىرساق جەۋدەن بايقاۋ ۇيىمداستىرىلدى. جارىس شارتى بويىنشا ءار سەبەتكە 65 دانادان باۋىرساق سالىنادى. قاتىسۋشىلارعا ءۇش مينۋت ۋاقىت بەرىلەدى. وسى ۋاقىت ىشىندە ەڭ كوپ باۋىرساقتى جەپ تاۋىسقان ادام جەڭىمپاز اتانادى.

 مەرەكەلىك شارادا 22 جاستاعى اۋىل تۇرعىنى نۇربەك دوقتىربەك ۇلى ۇزدىك شىعىپ، 1 -ورىندى يەلەندى. قوماعايلىعىمەن كوزگە تۇسكەن وزگە دە قاتىسۋشىلارعا ارنايى سىيلىقتار تابىستالدى، دەپ حابارلايدى 24.kz.

- ۇلتتىق تاعامداردى ناسيحاتتاۋ ماقساتىندا ءبىز بۇگىن ءۇش مىڭ دانا باۋىرساق دايىندادىق. جارىسقا كورەرمەندەر كەزەڭ-كەزەڭىمەن قاتىسىپ جاتىر. ەڭ كوپ باۋىرساق جەگەن قاتىسۋشى 42 داناسىن جەپ تاۋىستى. 3 مىڭ دانا باۋىرساقتىڭ 2,5 مىڭى جەلىندى، - دەيدى جارىستىڭ ءمان- جايىنان حابار بەرگەن ونىڭ ۇيىمداستىرۋشىسى جانىبەك مىرزاليەۆ.