قازاقستاندىقتار جارىنىڭ ادالدىعىن تەكسەرۋ ءۇشىن دەتەكتيۆكە ءجيى جۇگىنەدى

استانا. قازاقپارات - جىرى بىتپەگەن جەكە مەنشىك تىڭشىنى زاڭداستىرۋ جوباسى ماجىلىستە قايتا قارالدى. دەپۋتاتتار «جاسىرىن اگەنتتەردىڭ جۇمىسىن پىسىقتاپ، حالىقارالىق ادام قۇقىقتارىنا ساي ەتىپ جاساپ جاتىرمىز» دەيدى.

ال قورعاۋشىلار بولسا، جاڭا زاڭدا دەتەكتيۆتەرگە قويىلعان شەكتەۋ كوپ دەپ رەنجۋلى.

قارا تەلپەك، ۇزىن جامىلعى كيەتىن تىڭشىلاردى بۇرىن-سوڭدى كينودان كورسەك، ەندى بۇل قىزمەت ەلىمىزدە رەسمي تىركەلۋى مۇمكىن.

حالىق قالاۋلىلارىنىڭ سوزىنشە، جەكە مەنشىك تىڭشىلارعا دەگەن سۇرانىس كوپ، ءبىراق بىلىكتى مامان جوق. سوندىقتان دا دەتەكتيۆتەر جايلى زاڭ تولىق ءپىسىپ جەتىلۋى ءۇشىن ۇزاق دايىندالىپ جاتقان كورىنەدى.

«بىزدە كاسىبي دەتەكتيۆتەر جوق. ويتكەنى بۇل سالادا ماماندار ەشقانداي تاجىريبە جيناقتاماعان. الايدا، بۇل قىزمەتكە جۇگىنەتىندەر وتە كوپ ەكەن. سوندىقتان ءبىز تىڭشىلارعا قاتىستى زاڭدى تولىقتىرىپ، حالىقارالىق ادام قۇقىعىنا ساي ەتىپ جاسايتىن بولامىز. ال زاڭ قاشان دايىن بولاتىنىن ايتا المايمىن، ءالى ازىرلىك ۇستىندە»، - دەدى دەپۋتات سۆەتلانا رومانوۆسكايا.

ال زاڭگەرلەر بولسا، جەكەمەنشىك دەتەكتيۆتەر الماتىدا وتە كوپ دەيدى.

ولار زاڭسىز قىزمەتىن قىمسىنباي عالامتور بەتىندە جارنامالاپ، ءناپاقا تاۋىپ ءجۇر. كاسىبىنە رۇقسات قۇجاتى بولماعاندىقتان، تۇراقتى مەكەن-جايى دا، كەڭسەلەرى دە جوق.

سونداي ءبىر جاسىرىن اگەنتپەن تەلەفون ارقىلى تىلدەسكەنىمىزدە، قىزمەتىنىڭ قۇنى 37 مىڭ تەڭگەدەن باستالاتىنىن جانە وزدەرى بۇرىنعى ءتارتىپ ساقشىلارى ەكەندىكتەرىن ايتتى.

«تاۋلىگىنە 200 دوللار اقى الامىز. تاپسىرىس بەرۋشىگە بەينە جانە فوتو تۇرىندە بارلىق ايعاق زاتتاردى ۇسىنامىز. الماتىدا جۇمىس ىستەپ جاتقانىمىزعا 5 جىل بولدى. بارلىعىمىز بۇرىنعى پوليتسيا قىزمەتكەرىمىز»، - دەدى ناريمان.

قازىرگى تاڭدا جۇرتشىلىق جاسىرىن اگەنتتى كوبىنەسە جارىنىڭ ادالدىعىن تەكسەرۋ مەن بالاسىنىڭ تىرلىگىن انىقتاۋعا جالدايدى ەكەن.

تىڭشىلار جۇمىسىنىڭ ناتيجەسىن فوتو نەمەسە بەينەتۇسىرىلىم ارقىلى تاپسىرادى. ال دايىندالىپ جاتقان زاڭنامادا بۇل قىزمەتتەرگە رۇقسات جوق. جاسىرىن اگەنت باقىلاۋىنداعى ادامنىڭ ءجۇرىس-تۇرىسىن، سۋرەتكە، بەينەباقىلاۋعا تۇسىرۋگە بولمايدى جانە وسى سىندى 16 ءتۇرلى قىزمەتىنە تىيىم سالىنعان.

«دايىندالىپ جاتقان زاڭنامادا جەكە مەنشىك دەتەكتيۆتەرگە شەكتەۋ كوپ. بۇل قول بايلاۋ بولىپ سانالادى. جالپى جاسىرىن تىڭشىنىڭ جۇمىسىن تەزىرەك وڭتايلى ەتىپ زاڭداستىرۋ قاجەت. سەبەبى ولاردىڭ قورعاۋشىلارعا سوت الدى جۇمىستارىن جۇرگىزۋگە كومەگى كوپ»، - دەدى ادۆوكات سۇڭقار نۇرماعامبەتوۆ.

قىزمەتتىڭ جاڭا ءتۇرىن حالىق قالاۋلىلارى زەينەتكە شىققان پوليتسەيلەرگە بەرۋ كەرەكتىگىن العا تارتۋدا. سەبەبى، ەلىمىزدە ءىز-ءتۇسسىز جوعالعان ازاماتتار مەن باعالى مۇلىكتەردى ىزدەستىرۋگە بىلىكتى ءتارتىپ ساقشىلارىنىڭ قىزمەتى اۋاداي قاجەت.

ەستەرىڭىزگە سالا كەتسەك، نۇرسۇلتان نازاربايەۆ 2010 - جىلى جەكە مەنشىك اگەنتتەردى زاڭداستىرۋدى تاپسىرعان. ال 2012 - جىلى ادىلەت مينيسترلىگى العاشقى جوبانى ازىرلەپ، ءماجىلىستىڭ قاراۋىنا بەردى. سودان بەرى بۇل زاڭ ءالى پىسىقتالۋ ۇستىندە.

«الماتى ت ۆ»