جاراپازان، اققا تولسىن ۇيدەگى قارا قازان
ءبىراق جاراپازان تەك ورازا ايتتا عانا ايتىلا ما؟ ناۋرىز مەيرامىندا دا جاراپازانداپ، ءاربىر ۇيگە ىزگى تىلەك تىلەيتىن ءداستۇردىڭ بولعانىن بىلەمىز بە؟
ناۋرىز - العاۋسىز كوڭىلمەن جاقسى ءسوز، ىزگى تىلەۋ، اق باتا استا- توك، بارىنشا مول ايتىلاتىن مەرەكە. ولاي بولسا، جاڭا جىلدا ءار شاڭىراققا قۇت- بەرەكە تىلەپ، باتا بەرىپ، جاراپازان ايتۋدىڭ ءوزىن ناۋرىزدىڭ يگى داستۇرلەرىنىڭ بىرىنە بالاي الامىز.
ەل ىشىندە جاراپازان تەك ورازا ايتتا عانا ايتىلادى جانە ورازا ايت پەن ناۋرىزدا ايتىلادى دەگەن ەكىۇداي پىكىر بار. بىزدىڭشە، جاراپازان دەگەندە جاراپازان،
اققا تولسىن ۇيدەگى قارا قازان، - دەپ كەلەتىن ولەڭ جولدارى ۇلىستىڭ ۇلى كۇنى جىرلانسا كەرەك.
جاراپازان ءسوزىنىڭ ءتۇپ- توركىنىن پارسىنىڭ «شاحارزابان» سوزىندە دەيتىن دە پىكىرلەر بار. ول پارسى تىلىندە شاھار كەزۋشى، كۇلدىرگى اقىن دەگەن ماعىنانى بىلدىرەدى ەكەن. ياعني اۋىل ارالاپ، ءۇي كەزىپ ءجۇرىپ ايتىلاتىن جاراپازاندا قاتىپ قالعان قاعيدا جوق، وعان ادەمى، جاراستى ءازىل- قالجىڭداردى دا اندەتىپ قوساتىن بولعان.
جاراپازاننىڭ جاتتاندى، قالىپتاسىپ قالعان ماتىندەرى بولعانىمەن، وعان ءوز جانىنان شىعارىپ، تۇرلەندىرىپ ايتۋعا دا ەرىك بەرىلگەن ەكەن.
وسى ءداستۇردى جاڭا زامان تالابىنا ساي قايتا جاڭعىرتىپ، ناۋرىز كۇنى جاقسى تىلەكپەن جاراپازانداپ جۇرسەك، نەسى ايىپ؟ جاراپازاننىڭ ۇلىس كۇنى دە ۇلىقتالاتىن ءداستۇر ەكەنىن ۇمىتپاساق ەكەن.
«الاش ايناسى»