قىرعىز پارلامەنتى ءتوراعاسىن جۇمىسقا ەرتە كەلۋگە شاقىردى
09:33, 20 - ناۋرىز 2015
استانا. قازاقپارات - قىرعىزستان پارلامەنتى دەپۋتاتى يرينا كارامۋشكينا بۇگىنگى پارلامەنت وتىرىسىندا سپيكەر اسىلبەك جەەنبەكوۆتەن جۇمىس ۋاقىتىن ەرتە باستاۋدى سۇراپ ءوتىنىش بىلدىرگەن.
بۇل تۋرالى ازاتتىقتىڭ قىرعىز رەداكسياسى حابارلادى.
كارامۋشكينانىڭ ايتۋىنشا، وعان بىشكەك تۇرعىندارى كۇندەلىكتى تاڭەرتەڭ مەملەكەت باسشىلارىنىڭ اۆتوكولىكتەرىن وتكىزۋ ءۇشىن جول بويىندا سارىلىپ كۇتىپ تۇرۋعا ءماجبۇر ەكەندەرىن ايتىپ شاعىمدانعان.
دەپۋتات كارامۋشكينا پارلامەنت سپيكەرىن كۇندەلىكتى جۇمىسقا قازىرگىدەي جۇمىس باستالار الدىندا 15 مينۋت ەمەس، كەمىندە ءبىر ساعات بۇرىن، تاڭەرتەڭگى ساعات سەگىزدە كەلۋگە شاقىرىپ ۇسىنىس جاساعان.
قىرعىزستان زاڭى بويىنشا، ەلدە پرەزيدەنت، پرەمەر-مينيستر جانە پارلامەنت سپيكەرى پوليتسيا كولىكتەرى ىلەسكەن كورتەجبەن جۇرەدى.