شارا بارىسىندا ق ر پرەمەر-ءمينيسترىنىڭ ورىنباسارى بەردىبەك ساپاربايەۆ ءسوز سويلەپ، ۇلتتىق تاريحي- مادەني مۇرامىزدى ساقتاۋ ماسەلەسىنە قوعام نازارىن اۋدارۋدىڭ ماڭىزدىلىعىنا توقتالدى، دەپ حابارلايدى «قازاقستان تاريحى» پورتالى.
ال اتالمىش مۋزەي ديرەكتورى دارحان مىڭباي «ۇلتتىق مۋزەيگە سىي تارتۋ» اكسياسىنا قاتىسۋشى ءوزىنىڭ كوللەكسياسىنداعى قۇندى جادىگەردى، ەل تاريحىنا قاتىستى ەلەۋلى مۇرانى نەمەسە ەلگە بەلگىلى تۇلعانىڭ قولدانعان زاتتارىن مۋزەيگە ساقتاۋعا تابىستاي الاتىنىن اتاپ ءوتتى.
بارلىق جاڭا جادىگەرلەرگە زاڭدىق نەگىزدە قابىلداپ الۋ شارتى جاسالىپ، ولار مۋزەيدىڭ قورىنا وتكىزىلەتىن بولادى.
اكسيا ب. ازىربايەۆ ك. ازىربايەۆتىڭ دومبىرالارىن، سىلدىرماعى مەن جەلپۋىشىن، كەمەر بەلدىگى مەن تاسپيىعىن، قاراكول بورىگى مەن جاينامازىن، قۇران كىتابى مەن شاپانىن جانە سۇيەنىش تاياعىن قابىلداۋمەن باستالدى. وليمپيادا چەمپيوندارى و. شيشيگينا جەڭىل جەڭسىز جەيدەسىن، س. ساپيەۆ التىن مەدالدارىن، جەڭسىز مايكاسى مەن قولتاڭباسى قويىلعان بوكس قولعابىن، ۆ. سميرنوۆ سپورتتىق بۇيىمدارىن سىيعا تارتتى. «قادىر مىرزا ءالى» قورىنىڭ ديرەكتورى د. قاجىموۆ ق. مىرزاليەۆتىڭ جەكە زاتتارى مەن ماراپات قۇجاتتارىن تاپسىردى.
جازۋشى ا. ناجىمەدەنوۆتىڭ، سپورتشى ج. ۇشكەمپىروۆتىڭ، مەملەكەت قايراتكەرى ج. تاشەنوۆتىڭ، كومپوزيتور ش. قالداياقوۆتىڭ، كەڭەس وداعىنىڭ باتىرى ق. قايسەنوۆتىڭ جەكە زاتتارى دا مۋزەيگە سىيعا بەرىلدى. سۋرەتشى گ. يسمايلوۆانىڭ ۇلى ۆ. سيدوركين اناسىنىڭ قىلقالامدارى مەن اۆتوليتوگرافياسىن جانە جەكە بۇيىمدارىن تاپسىردى.
سۋرەتشى ا. قازىعۇلوۆتىڭ جۇمىستارى، ۇلى وتان سوعىسى ارداگەرى، پانفيلوۆشى ا. مەڭدىعاليەۆتىڭ ءمۇسىنى، مەككەگە جاياۋ بارعان يمان قاجىنىڭ ساپارى كەزىندە ۇستاعان قازاقستان تۋى، ح. ابايەۆتىڭ ورىنداۋىنداعى مۇحتار اۋەزوۆتىڭ پورترەتى، ق ر ادىلەت ءمينيسترىنىڭ ورىنباسارى ب. ءابدىرايىم ۇسىنعان اق مەتالدان جاسالعان ءبيدىڭ ءتوس بەلگىسى، مەملەكەت جانە قوعام قايراتكەرى، ساياساتتانۋشى عالىم ە. قاريننىڭ جەكە جيناعىنداعى جەبە ۇشتارى ۇلتتىق مۋزەي قورىن تولىقتىرا ءتۇستى.
سىي-تارتۋلار نەگىزىندە ارنايى كورمە ۇيىمداستىرىلدى.
«ۇلتتىق مۋزەيگە سىي تارتۋ» اكسياسى جىل بويى جۇرگىزىلىپ، بيىلعى جەلتوقسان ايىندا قورىتىندىلاناتىن بولادى.