ورالدا جاڭا جيھاز فابريكاسىن اشپاق - فوتو
«بيزنەستىڭ جول كارتاسى - 2020» باعدارلاماسى اياسىندا پايىزدىق مولشەرلەمەنى دەمەۋ قارجىلاندىرۋ بويىنشا مەملەكەتتەن قولداۋ العان كاسىپورىن ءوندىرىس اياسىن وسىلايشا كەڭەيتە تۇسپەك.
قازىرگى تاڭدا ءىرى نىساننىڭ ىشكى جۇمىستارى عانا اتقارىلۋدا. كوپ ۇزاماي گەرمانيالىق Nomag فيرماسىنىڭ جابدىقتارى ورناتىلادى. بيىل جازدا ىسكە قوسىلۋى كوزدەلىپ وتىرعان جاڭا فابريكادا جاتىن، اسءۇي جانە بالالار گارنيتۋرلارى، باسقا دا ءتۇرلى جيھازدار شىعارىلماق. مامانداردىڭ پايىمداۋىنشا، بۇل ءوندىرىس كولەمىن ەكى ەسە ۇلعايتۋعا مۇمكىندىك بەرەدى.
كۇنى بۇگىن دە كاسىپورىن سەحتارىندا جيھازدار جاسالۋدا. نەگىزىنەن سەريالى تۇردە شىعارىلاتىن ونىمدەر ءوز ەلىمىزدىڭ نارىعىنا باعىتتالعان. اقساي، اتىراۋ قالالارىندا «كۆانتتىڭ» ءوز دۇكەندەرى بولسا، باسقا وبلىستارعا دا ساۋدا جەلىلەرى ارقىلى جىبەرىلەدى.
كاسىپورىن بۇدان بۇرىن كورپۋستىق جيھاز ءۇشىن ماتراستار مەن پەنوپوليۋرەتان ءوندىرىسىن جولعا قويعان بولاتىن. «بيزنەستىڭ جول كارتاسى - 2020» باعدارلاماسى اياسىندا جۇزەگە اسىرىلعان بۇل جوبانىڭ قۇنى - 390 ميلليون تەڭگە (300 ميلليون تەڭگە - نەسيە، 90 ميلليون تەڭگە - ءوز قارجىسى). جۇمساق جانە كورپۋستىق جيھاز ءۇشىن پەنوپوليۋرەتان مەن ماتراستار كاسىپورىننىڭ ءوز قاجەتى ءۇشىن وندىرىلەدى. بۇل ءونىمنىڭ وزىندىك قۇنىن تومەندەتۋگە سەپتەسەدى. وتكەن جىلى 208,1 ميلليون تەڭگەگە 121,7 توننا پەنوپوليۋرەتان مەن 9850 دانا ماتراس ءوندىرىلىپ، جوبا 70 پايىزدىق قۋاتىنا شىقتى.
ايتا كەتەيىك، 1991 - جىلى قۇرىلعان «كۆانت» ج ش س اۋديو، بەينە جانە تۇرمىستىق تەحنيكالاردىڭ كوتەرمە جانە بولشەك ساۋدالارىمەن دە اينالىسادى، ءىرى ساۋدا ورتالىقتارى بار. كوپتەگەن شەتەلدىك ءىرى كومپانيالاردىڭ رەسمي ديلەرى بولىپ تابىلاتىن «كۆانتتا» 1200-دەي ادام ەڭبەك ەتەدى. مۇندا قىسقارتۋ تۋرالى اڭگىمە جوق.
قايتا ءوندىرىس ورىندارىن كەڭەيتۋ ارقىلى مامانداردى ودان ءارى تۇراقتاندىرۋعا كۇش سالىنۋدا. ەڭ باستىسى، ەلىمىزدە وتاندىق وندىرىسكە باسا نازار اۋدارىلىپ وتىرعان كەزەڭدە جاڭا تەحنولوگيا نەگىزىندە باسەكەگە قابىلەتتىلىكتى ارتتىرا ءتۇسۋعا ەرەكشە ءمان بەرىلۋدە.
اۆتور: ەلجان ەرالى