استانا تۇرعىندارى قوقىستاردى ءبولىپ جيناۋدى ۇيرەنۋدە

استانا. قازاقپارات - استانا تۇرعىندارى قوقىستاردى تيپىنە قاراي ءبولىپ جيناۋى ءۇشىن جاعداي جاسالۋدا.

بۇل تۋرالى بۇگىن قالا بويىنشا وتكەن باسپا ءسوز تۋرى بارىسىندا استانا قالالىق اكىمدىگىنىڭ تابيعي رەسۋرستاردى باسقارۋ باسقارماسى جەتەكشىسىنىڭ ورىنباسارى ميراس ايسين ايتتى.

«قازاقستاننىڭ «جاسىل ەكونوميكاعا» كوشۋ جاعدايى اياسىندا استانا اكىمدىگى 2015 - جىلدىڭ 1 - ناۋرىزىنان باستاپ قاتتى تۇرمىستىق قالدىقتاردى ءبولىپ جيناۋ جونىندەگى پيلوتتىق جوبانى ىسكە اسىرۋدا.

وسى شارا اياسىندا قالا اۋلالارىنا 160 ارنايى دايىندالعان ءتۇرلى- ءتۇستى كونتەينەرلەر قويىلدى. ياعني كوك جاشىككە قاعاز جانە سوعان ۇقساس قالدىقتار، قىزىل جاشىككە شىنى قالدىقتار جانە سارى جاشىككە پلاستيك قالدىقتار ءبولىپ تاستالادى. ءبولىپ جينالعان قوقىستى تاسىمالداۋ شاراسىن «استانا تازارتۋ» ج ش س جۇزەگە اسىرادى. بۇل ءۇشىن ارنايى ەكى كولىك قاراستىرىلعان»، - دەپ اتاپ ءوتتى م. ايسين.

ونىڭ ايتۋىنشا، بۇل جوبا اياسىندا «PosadiDerevo.kz» قوعامدىق بىرلەستىگى ۇگىت- ناسيحات جۇمىستارىن جۇرگىزۋدە. اتاپ ايتار بولساق، تۇرعىندارعا اقپاراتتىق پاراقشالار تاراتىلىپ، سىرتقى جارنامالار ىلىنەدى. قوقىستى ءبولىپ جيناۋدى ۇيرەتەتىن ارنايى بەينەروليكتەر تۇسىرىلۋدە. جوبا ءوزىن- ءوزى اقتاپ جاتسا، بولاشاقتا مۇنداي قوقىس جاشىكتەرى قالانىڭ بارلىق اۋلالارىنا قويىلادى.

سونىمەن قاتار، 2013 -جىلدىڭ 1 -تامىزىنان باستاپ «استانا قالاسىنىڭ 2013-2016 -جىلدارعا ەنەرگوۇنەمدەۋ كەشەندى جوسپارى» بويىنشا حالىقتان قۇرامىندا سىنابى بار ىستەن شىققان شامداردى جيناۋ جوباسى جۇزەگە اسىرىلۋدا. جوبا شەڭبەرىندە اۋلا اۋماقتارىندا ارنايى كونتەينەرلەر ورناتىلعان، وسى ۋاقىتقا دەيىن تۇرعىنداردان 1,2 ميلليون دانا شام جينالعان جانە قايتا وڭدەلگەن.

كۇلدى جيناۋ بويىنشا تاعى ءبىر پيلوتتىق جوبا 2014 -جىلدىڭ 1 -قاراشاسىنان باستاپ ەنگىزىلدى. جوبا شەڭبەرىندە قالانىڭ جەر ۇيلەر ورنالاسقان اۋماقتارىنا 75 كونتەينەر ورنالاستىرىلىپ، وسى ۋاقىتقا دەيىن 600 توننا كۇل جينالىپ، پوليگوندارعا تاسىلدى.

م. ءايسيننىڭ ايتۋىنشا، جەكە سەكتورداعى تۇرعىندار پەشتەن جاڭا شىققان كۇلدى قوقىس جاشىكتەرىنە توگۋ سەبەبىنەن ونداعى قوقىستار تۇتانىپ، جانىپ، كونتەينەردىڭ تەز ىستەن شىعۋىنا نەگىز بولادى. سوندىقتان ىستىق تەمپەراتۋراعا ءتوزىمدى وسىنداي كونتەينەرلەر قويۋ، بۇل ماسەلەنى شەشۋگە جول اشادى.

بيىل اكىمدىك كۇلگە ارنالعان كونتەينەرلەر سانىن مولايتۋدى كوزدەپ وتىر. قازىرگى كەزدە ولار شۇبار، كوكتال، لەسوزاۆود جانە يلينكا كەنتتەرىنە ورنالاستىرىلعان.

اۆتور: ءابۋ-اسقار مەكەش ۇلى