پەتروپاۆلدا «قازاقستاندا جاسالعان» كاسىپكەرلەر فورۋمى ءوتتى
پلەنارلىق وتىرىستا قاتىسۋشىلار كاسىپكەرلىكتى دامىتۋ، مەملەكەت تاراپىنان شاعىن جانە ورتا بيزنەس سۋبەكتىلەرىن قولداۋداعى تۇيىتكىلدى ماسەلەلەردى ورتاعا سالدى.
شاراعا ۇلتتىق كومپانيالار مەن حولدينگتەر، ۇلتتىق كاسىپكەرلەر پالاتاسى، مەملەكەتتىك ورگاندار، قورلار مەن دامۋ ينستيتۋتتارى باسشىلارى مەن وكىلدەرى، بيزنەس سۋبەكتىلەرى قاتىستى.
فورۋمدى اشقان ءوڭىر باسشىسى ەرىك سۇلتانوۆ وبلىستا قازاقستاندىق مازمۇندى دامىتۋعا باعىتتالعان فورۋمداردى وتكىزۋ تاجىريبەسى قايتا قولعا الىنىپ، مەموراندۋمدار مەن كەلىسىمدەر جاساۋ ءۇردىسى جالعاساتىنىن ايتتى.
وڭىرىمىزدە «قازاقستاندا جاسالعان» اكسياسى باستالىپ كەتتى، تۇرعىندار اراسىندا اقپاراتتىق-ناسيحات جۇمىستارى جۇرگىزىلىپ جاتىر.
«نۇرلى جول» باعدارلاماسى اياسىندا ءبىز جەرگىلىكتى تاۋار وندىرۋشىلەردى قولداۋدى جوسپارلاپ وتىرمىز. فورۋم وتاندىق ءوندىرىستىڭ ودان ءارى دامۋىنا جەرگىلىكتى مازمۇننىڭ ۇلعايۋى مەن ءوزارا تيىمدى ىنتىماقتاستىق پەن ىسكەرلىك بايلانىستاردى نىعايتۋعا كومەكتەسەدى دەپ سەنەمىن»، - دەدى ءوڭىر باسشىسى.
سونداي-اق، بيزنەس-قاۋىمداستىق وكىلدەرى رەسپۋبليكالىق جوبا اياسىنداعى جۇمىستاردىڭ جالپى ناتيجەلەرىن تالقىلادى. بۇگىندە وڭىردە اكسياعا 97 پايىز ساۋدا نۇكتەلەرى قوسىلدى. «قازاقستاندىق ونىمگە دەگەن سۇرانىس 30 پايىزعا ارتتى. قول جەتكىزگەن جەتىستىكتەردى ودان ءارى جالعاستىرا بەرۋ قاجەت»، - دەدى اكىم.
پلەنارلىق وتىرىستىڭ قورىتىندىسى بويىنشا، ءوڭىر كاسىپورىندارى اراسىنداعى ودان ءارى ىنتىماقتاستىق بويىنشا سوماسى 500 ميلليون تەڭگە بولاتىن 9 مەموراندۋمعا قول قويىلدى.