ناۋرىز مەرەكەسىن اسىعا كۇتەتىن نەمىس اجەي

قىزىلوردا. قازاقپارات - قازالى اۋدانى، ايتەكە ءبي كەنتىنىڭ تۇرعىنى ۇلتى نەمىس ەگوف يرنا اجەي ناۋرىز مەرەكەسىنە دايىندالۋ ۇستىندە. ول جىل سايىن ۇلىستىڭ ۇلى كۇنىن ەرەكشە قۋانىشپەن قارسى الادى.

ەگوف يرنا اجەيدىڭ ايتۋىنشا، ول  ۇلىستىڭ ۇلى كۇنىن ەرەكشە كۇتەدى. بۇل كۇنى يرنا اجەي داستارحانىن قازاقتىڭ ۇلتتىق تاعامىمەن تولتىرادى. توقشىلىق پەن ىرىس-قۇتتىڭ بەلگىسى سانالاتىن ناۋرىز كوجەنى دە اسا ءدامدى ەتىپ دايىندايدى.

بار جاقسىلىق ناۋرىزدان باستاۋ الادى دەگەنگە سەنەتىن يرنا اجە ناۋرىز مەرەكەسىن جىل سايىن بالالارىنىڭ ورتاسىندا تويلايدى.

ومىردەرەگىنە ۇڭىلسەك، رەسەي جەرىندە دۇنيەگە كەلگەن يرنا اجەي تالاي قيىن زاماندى باسىنان وتكەرگەن. قازاقستانعا كەلىپ، قازاق جىگىتىنە تۇرمىسقا شىعىپ، باقىتىن تاپقان. ول 4 ۇل مەن 5 قىزدىڭ ارداقتى اناسى اتاندى. بۇل كۇندە 36 نەمەرە مەن 28 شوبەرەنىڭ اياۋلى اجەسى.

«مەنىڭ تەگىم باسقا بولعىنىمەن، جانىم - قازاق. ناۋرىز مەرەكەسى ەلدەگى تاتۋلىق پەن بىرلىكتىڭ دالەلى، ىرىس پەن قۇتتىڭ باستاۋى»، - دەيدى التىن قۇرساقتى اياۋلى انا.

اۆتور: ەلۋباي اۋەزوۆ